चार दिने नेपाल भ्रमणमा आएका अमेरिकी सेनाको इन्डो प्यासिफिक कमाण्डर चार्ल्स ए फ्लिनले आइतबार नेपाली सेनाका दुई कार्यालयमा पुगेका छन्।

पाँचखालस्थित वीरेन्द्र शान्ति कार्य तालिम केन्द्र र शिवपुरीस्थित सैनिक कमाण्ड तथा स्टाफ कलेजको भ्रमण गरेको सैनिक प्रवक्ता नारायण सिलवालले जानकारी दिए।

शान्ति कार्य तालिम केन्द्रका केन्द्रपति सहायक रथी सन्तोष बल्लव पौडेलले फ्लिनसहितको भ्रमण टोलीलाई तालिम केन्द्रको बारेमा जानकारी गराएका थिए।

भ्रमणदलले शान्ति स्थापना कार्यको दौरान आवश्यक पर्ने विभिन्न प्रदर्शनीको अवलोकन समेत गरेका थिए।पाँचखालबाट टोली शिवपुरीस्थित सैनिक कमाण्ड तथा स्टाफ कलेजमा पुगेको थियो। त्यहाँ फ्लिनले कलेजका शिक्षाध्यक्षसँग भेटघाट तथा तालिमरत शिक्षार्थी अधिकृतहरुसँग अन्तरक्रिया गरेका थिए।

फ्लिनले कलेज परिसरमा वृक्षारोपण समेत गरेका छन्। कलेजमा सम्बाेधन गर्दै फ्लिनले नेपाली सेना भरपर्दो जमिनी शक्ति भएको बताए। संसारकै पूरानासेनाहरुमध्ये नेपाली सेना पनि एक रहेको फ्लिनले बताए।

अमेरिकी सेनाको कमाण्डरको सद्भाव भ्रमण भएकाले यसले दुई देशबीचको सैनीक सम्बन्धलाई थप प्रगाढ बनाउने नेपाली सेनाको विश्वास छ। नेपालको चारदिने औपचारिक भ्रमण सम्पन्न गरी फ्लिनको टोली आजै स्वदेश फिर्ता हुने कार्यक्रम रहेको प्रवक्ता सिलवालले जानकारी दिए।

LEAVE A REPLY

Please enter your comment!
Please enter your name here