धमिन महर्जन
काठमाडौं – ‘भूकम्पपछिको खोकना, स्थानीय सीप र संस्कृति जगेर्ना’ भन्ने नाराका साथ फागुन ९ गतेदेखि ११ गतेसम्म चलेको खोकना पर्यटन महोत्सव २०७६ सम्पन्न भएको छ ।
खोकना गाउँलाई महत्वपूर्ण ग्रामीण पर्यटकीय गन्तव्यका रुपमा स्थापित गर्न आयोजित महोत्सवमा करिव २० हजार भन्दा बढि आन्तरिक तथा बाहिय पर्यटकले अवलोकन गरेको आयोजकले जनाएको छ ।
महोत्सवमा मौलिक संस्कृति तथा लोकप्रिय नेवार परिकार, परम्परागत दाफा भजनको साथै वाद्य परम्पराको बृहत् प्रदर्शनी गरिएको थियो ।
खोकनाको लोप भइसकेको प्राचीन जीवनशैलीकोसमेत जीवन्त प्रस्तुति रहने यस महोत्सवमा नेवाः मौलिक वास्तुकला, लाखेनाच, स्थानीय सीप तथा उत्पादनसमेत पर्यटकले अवलोकन गरेका थिए ।
शुद्ध तोरीको तेलका लागि ख्याति कमाएको खोकना नेपालमै पहिलो र एसियाको दोस्रो आधुनिक विद्युतीय बत्ती बलेको गाउँ हो भने पहिलो कलधाराको शुद्ध पानीको व्यवस्था भएको गाउँ पनि हो ।
साँस्कृतिक परम्पराले ध्यान तान्दै आएको खोकनामा दसैं मनाउने चलन छैन । स्थानीय जात्रापर्वमा रमाउने यहाँको जीवनशैलीमा सुँगुर, बंगुर र कुखुरा पूर्णरुपमा निषेध छ ।
