काठमाडौं – प्रधानमन्त्री केपी शर्मा ओलीको आज दोस्रो पटक मिर्गौला प्रत्यारोपण हुने भएको छ । नेपाली चिकित्सकको टोलीले बिहान ९ बजेदेखि प्रधानमन्त्री ओलीको मिर्गौला प्रत्यारोपण सुरु गर्ने त्रिवि शिक्षण अस्पतालका प्राध्यापक डा. अरुण सायमीले जानकारी दिएका छन् ।
डा. सायमीले प्रधानमन्त्री ओलीको मिर्गौला प्रत्यारोपण कार्य सम्पन्न हुन करिब तीनघण्टा लाग्ने बताए । यसपटक प्रधानमन्त्री ओलीले भान्जी समीक्षा संग्रौलाले मिर्गौला दान गर्न लागेका हुन् । त्रिवि शिक्षण अस्पताल युरोलोजी तथा ट्रान्सप्लान्ट विभागका प्राध्यापक.डा.प्रेम ज्ञवाली नेतृत्वको चिकित्सक टोलीले प्रधानमन्त्री ओलीको मिर्गौला प्रत्यारोपन गर्ने उनले जानकारी दिए ।
यस्तै, भारतीय मिर्गौला प्रत्यारोपण विशेषज्ञ डा. अमितकुमार नेतृत्वको विदेशी चिकित्सकहरूको एक टोली पनि तयारी अवस्थामा राखिएको उनले बताए । यसअघि मङ्गलबार प्रधानमन्त्री ओलीको मिर्गौलाको डाइलायसिस गरिएको थियो । डाइलायसिसको क्रममा सबै रिपोर्ट राम्रो रहेको अस्पतालका कार्यकारी निर्देशक प्राध्यापक डा. प्रेमकृष्ण खड्काले विज्ञप्ति मार्फत उल्लेख गरे ।
१२ बर्षपछि प्रधानमन्त्री ओलीको दोस्रोपटक मिर्गौला प्रत्यारोपण गर्न लागिएको हो । यसअघि उनले भारतको एपोलो अस्पतालमा पहिलोपटक मिर्गौला प्रत्यारोपण गराएका थिए ।
