काठमाडौं – बडादसैँको बिदाका बेला घुमघाम गर्न भक्तपुर दरबार क्षेत्रमा आन्तरिक र बाह्य पर्यटकको बाक्लो उपस्थिति रहेको थियो । सार्वजनिक बिदा र चाडपर्वको समयमा भक्तपुरमा तुलनात्मक रूपमा आन्तरिक र बाह्य पर्यटकको बाक्लो उपस्थिति देखिन्छ ।
भक्तपुरको दूधपाटीस्थित सिद्धपोखरी जिल्लाभरिकै ठूलो पोखरी हो। यस पोखरीलाई नेपाल भाषामा तः पुखु भनिन्छ । भक्तपुर सहरभित्र सानाठूला गरी ३४ पोखरी छन् । तीमध्ये सबैलाई पायक पर्ने र आकर्षक मानिन्छ सिद्धपोखरी ।
सिद्धपोखरीमा भक्तपुर नगरपालिकाले सञ्चालन गरेको डुंगा चढ्न प्रतिव्यक्ति १०० रुपैयाँ तोकिएको छ । विद्यार्थी, बालबालिका, वृद्धवृद्धालाई ५० रुपैयाँ लिइन्छ । एउटा डुंगामा चार जनासम्म बस्न सकिन्छ । यहाँ सातवटा डुंगा सञ्चालित छन् । बिहान साढे १० बजेदेखि साँझ साढे ५ बजेसम्म डुंगा सयर गर्न सकिन्छ । बेलुका ७ बजे पोखरी बन्द हुन्छ ।
त्यस्तै, पछिल्ला दिनमा भक्तपुर नगरपालिका-१ इताछेँस्थित नःपुखुमा सञ्चालनमा आएको पानीमाथि चलाउने ‘वाटर साइकल’ पर्यटकको रोजाइमा परेको छ ।
आन्तरिक र बाह्य पर्यटकलाई आकर्षित गर्ने उद्देश्यले सञ्चालनमा ल्याइएको वाटर साइकल पछिल्ला दिनमा पर्यटकको रोजाइमा परेको हो । बाइकमा एकजना बराबर १५ मिनेटको दुईसय शुल्क लाग्छ ।
