पोखरा – पर्यटकीय नगरी पोखरा आन्तरिक तथा बाह्य पर्यटकको मुख्य रोजाइमा पर्ने गर्दछ। त्यहाँको अर्को गन्तव्य भनेको अन्नपूर्ण केवलकार चढेर सराङकोट डाँडाबाट सूर्योदयको दर्शन तथा साँझ सूर्यास्तको अवलोकन गर्नु पनि हो ।
केवलकारबाट फेवाताल, अन्नपूर्ण, माछापुच्छ्रे , हिमचुली लगायतका हिमाल श्रृखला, पुम्दीकोट महादेवको मूर्ति, विश्व शान्ति स्तुपाः, पोखरा लगायतको मनोरम दृश्य पनि अवलोकन गर्न सकिने छ।
समुद्री सतहबाट एक हजार ४५० मिटर उचाइमा रहेको सराङकोट सूर्योदय, हिमश्रृखला अवलोकनका हिसाबले महत्त्वपूर्ण छ। यहाँबाट पोखराको भौगोलिक बनावट, फेवाताल, माछापुच्छ्रे हिमालले छ्याङ्गै देखिन्छन्।
सराङकोट पर्यटकको रोजाइमा पर्नुको प्रमुख कारण अन्नपूर्ण केबलकार। लेकसाइडबाट गाडीमा एक घण्टा लाग्ने सराङकोट अहिले पोखरा महानगपालिका-२६ स्थित सेदीमा अन्नपूर्ण केबलकार बनेसँगै १० मिनेटमै पुगिन्छ। केबलकारले पोखराका लेकसाइड र सराङकोटको दूरी मात्रै घटाएको छैन, पर्यटकका लागि सजिलो पनि बनाएको छ।
सराङकोटमा बासको पनि राम्रो व्यवस्था छ। साना-ठूला गरी ४० जति होटल छन्। पोखराभन्दा सराङकोटमै रात बिताउने पर्यटकको संख्या बढ्दै गएको छ।
