काठमाडौँ – चोभारको मञ्जुश्री पार्कमा नेपालकै पहिलो क्यानोपी जिपलाइन सञ्चालनमा आएको छ। जे.भि.एड्भेन्चर प्रा.लि.ले सञ्चालनमा ल्याएको क्यानोपी जिपलाइन नेपालकै पहिलो हो । तीन चरण गरेर खेल्न पाइने क्यानोपी जिपलाइनको कुल लम्बाइ करिब ४ सय मिटर छ । सबै चरणको क्यानोपी जिपलाइन खेल्न करिब १० मिनेट लाग्छ ।
जिपलाइन खेल्दा गरिने अनुभुति अनुसार पहिलो चरणलाई ‘एड्भेञ्चर’, दोस्रोलाई ‘डेयर डेभिल्स’ र तेस्रोलाई ‘द फन’ नामाकरण गरिएको छ ।
जिपलाइनका क्रममा मन्जुश्रीले काटेको चोभारको आकर्षक गल्छी, जलबिनायक मन्दिर, चोभारको गुम्बा, नवनिर्मित सुख्खा बन्दरगाह, चम्पादेवी र चन्द्रागिरी डाँडा, काठमाडौँ तथा ललितपुरका सुन्दर दृश्यावलोकन गर्न सकिनेछ । टेकअफ टावरबाटै सुन्दर हिमशृङ्खला देख्न सकिन्छ ।
तीन अर्बको लगानी योजनासहित निर्माण थालिएको यस क्यानोपी जीपलाइन आगामी एक वर्षमा निर्माण भइसक्ने सञ्चालक प्रदीप चौलागाईले जानकारी दिए । ‘चोभार डाँडामा एड्भेन्चर हब नै बनाउने तयारी रहेको छ। मञ्जुश्रीले काटिएको खोँचमा ग्लास ब्रिज निर्माण गरिनेछ । उक्त ब्रिजमा स्विङ्, स्काई साइक्लिङ र स्काई वाक बनाइनेछ ।’ चौलागाईले भने ।
