सिन्धुली – कोरोना भाइरसको फैलिन नदिन सरकारले देश लकडाउन गरेको कारण उपत्यकामा फसेका सिन्धुली तिनपाटन गाउँपालिका मजदुर, विद्यार्थी र सर्वसाधरण गाउँपालिकाले उद्दार गरेको छ ।
राजधानीमा अलपत्र परेका मदजुर, विद्यार्थी तथा सर्वसाधरणलाई तिनपाटन गाउँपालिकाले धमाधम आफ्नो गाउँघर फर्काउन थालेको हो । गाउँपालिकाले नै आर्थिक खर्च व्यहोर्ने गरी गाडिको व्यवस्थासहित नागरिकलाई गाउँ ल्याएको हो ।
तीनपाटन गाउँपालिकाको अनुसार ‘काठमाडौंमा अलपत्र परेका सर्वसाधरणलाई नौ वटा बसको व्यवस्था गरी ६५८ जनालाई सिन्धुली ल्याईएको छ । गाउँपालिकाको वडा नं ३ झार्लङटारमा पालिका बाहिरबाट आएका नागरिकको स्वास्थ्य जाँच गरेपछि मात्रै घर पठाउने गरिएको छ । उपत्यकाबाट आएका सर्वसाधरणहरु १४ दिन होम क्वारेन्टाइनमा बस्नुपर्ने विषयलाई गाउँपालिकाले अनिवार्य बनाएको छ । त्यसपछि स्वास्थ्यमा केही समस्या देखिए थप परिक्षण तथा उपचार गरिने व्यवस्था गाउँपालिकाको छ ।’
त्यस्तै एकसय ५० भन्दा बढी गाउँपालिकाको सम्पर्कमा आएका पोखरामा रहेका नागरिकलाई लिन तिनपाटन गाउँपालिकाले आज तीनवटा बस पोखरा पठाएको छ ।
तिनपाटनको तीन नम्बर वडाअध्यक्ष लाल बहादुर स्याङतानले काठमाडौंमा बाँकी रहेका आफ्नो वडाका नागरिकलाई उनिहरु बसिरहेको घरमानै राहत स्वरुप खाद्यान्न पठाएका बताए । हालसम्म ५७ परिवारलाई खाद्यान्न उपलब्ध गराएकाको जानकारी समेत उनले जानकारी दिए ।
तिनपाटन गाउँपालिका अध्यक्ष कर्ण थापाले यो आफ्नो कर्तव्य भएको बताउँदै यस्तै समस्यामा परेको कोही हुनुहुन्छ भने गाउँपालिकामा सम्र्पक गर्न समेत अनुरोध गरेका छन् ।
काठमाडौं लगायत अन्य क्षेत्रमा पेशा, तथा व्यवसाय गर्न पुगेका नागरिकहरुलाई ल्याउने तयारीको विषयमा गाउँपालिकाले छलफल गरिरहेको छ ।
