काठमाडौंमा विश्व सामाजिक मञ्चको सम्मेलन सुरु भएकाे छ । ‘अर्को विश्व सम्भव छ’ भन्ने नाराका साथ आजदेखि विश्व सामाजिक मञ्चको १६ औँ संस्करण सुरु भएको हो। सम्मेलनमा ९२ मुलुकका करिब ४० हजारको सहभागिता रहने आयाेजककाे दाबी छ ।
विश्वका सीमान्तकृत समुदायको अधिकारका लागि आवाज उठाउने उद्देश्यले नेपालमा पहिलोपटक आयोजना गरिएको सम्मेलन चार दिनसम्म चल्नेछ।
सम्मेलनका क्रममा आज सम्मेलनस्थल भुकुटीमण्डपबाट रत्नपार्क हुँदै पुनः भृकुटीमण्डपसम्म पदयात्रा (मार्चपास) थियो । पदयात्रामा न्याय, शान्ति, समानता, विभेदको अन्त्यलगायत सामग्री समेटिएका ब्यानर र प्लेकार्ड प्रदर्शन गरिएको थियो ।
पदयात्रालाई विभिन्न क्षेत्र र अधिकारसँग सम्बन्धित राष्ट्रिय र अन्तर्राष्ट्रिय संस्थाले ऐक्यबद्धता जनाएका छन् । सम्मेलनमा विश्वचर्चित समाजवादी आन्दोलनका नेता चे ग्वेभारीकी छोरी एलिडा ग्वेभारा पनि सहभागी भएकी छन् ।
यस्तै, भारतका मानवअधिकारकर्मी तथा नर्मदा बचाओ आन्दोलनका अभियन्ता मेधा पाटकर पनि सम्मेलनमा सहभागी भएकी छिन् ।
तस्वीरहरू : रमिता छुँजु
