काठमाडौं – बलिउडका चर्चित अभिनेता ऋषि कपुरको ६७ वर्षको उमेरमा बिहीबार निधन भएको छ । क्यान्सरबाट पीडित ऋषि कपुर अस्वस्थ भएपछि बुधबार अस्पताल भर्ना गरिएको थियो ।
दाइ रणधीर कपुरका अनुसार ऋषिलाई क्यान्सर र स्वासप्रश्वाससम्बन्धी समस्या थियो । अमेरिकामा करिब एक वर्षसम्म क्यान्सरको उपचार गराएपछि उनी गत वर्ष सेप्टेम्बर महिनामा भारत फर्किएका थिए । फेब्रुअरी महिनामा पनि स्वास्थ्य बिग्रिएपछि उनलाई दुई पटकसम्म अस्पताल भर्ना गर्नु परेको थियो । उनी बलिउड अभिनेता रणवीर कपुरका बाबु हुन्।
उनको अन्तिम चलचित्र इमरान हाशमीसँगको द बडी हो । उनी अभिनेत्री दीपिका पादुकोणसँग हलिउड चलचित्र द इन्टर्नको हिन्दी रिमेकमा काम गर्ने तयारीमा थिए ।
ऋषि कपूरले सन् १९७३ मा बबी चलचित्रबाट आफ्नो अभिनय यात्रा सुरु गरेका थिए । उनले बालकलाकारका रुपमा श्री ४२० र मेरा नाम जोकर चलचित्रमा काम गरेका थिए ।
थुप्रै फिल्ममा अभिनय गरेका पुरानो पुस्ताका अभिनेता कपुरको पहिरन वा हेयर स्टाइल कुनै बेला स्टाइल नै बन्ने गर्थ्यो ।
उनका कर्ज, दो दुनी चार, खेल खेल मेँ, लैला मज्नु, प्रेम रोग, अग्निपथ, जमानेको दिखाना है, चाँदनी लगायत फिल्म हिट छन्। उनका छोरा रणवीर कपुर पनि फिल्म क्षेत्रमा स्थापित भइसकेका छन्। ऋषिका पिता राज कपुर हुन्। उनी पनि प्रख्यात अभिनेता, निर्माता तथा निर्देशक थिए।
बुधबार मात्रै अर्का अभिनेता इरफान खानको निधन भएको थियो ।
