काठमाडौँ – नेपाली सेनाले कोरोना भाइरस रोकथाम र नियन्त्रणका लागि चीनबाट खरिद गरेको अतिआवश्यक स्वास्थ्य सामग्री सम्झौताअनुसारै ढुवानी भएको भए, मंगलबार बेलुकीसम्म सामग्री काठमाडौं आईपुग्नु पर्ने हुन्छ ।
तर,भनेअनुसार काम हुन नसकेपछि ती स्वास्थ्य सामग्रीहरु कहिलेसम्म नेपाल भित्रिन्छन् भन्ने टुंगो लागिसकेको छैन । सामग्री कहिले नेपाल आइपुग्छन् त ? यसको उत्तर स्वयं सम्झौता गर्ने सेनासँग पनि छैन ।
सैनिक प्रवक्ता विज्ञानदेव पाण्डे केही दिनयता चीनमा लगातार सरकारी बिदा पर्नु, नेपालसहित विश्वका अन्य मुलुकहरुले पनि एकैपटक स्वास्थ्य सामग्री आपूर्ति गर्न खोज्नु, सबै मुलुकलाई एकैपटक सामग्री चाहिएको कारण विमानस्थलमा ट्राफिकको समस्या हुनु र भन्सारका चेक–जाँच गर्न समय लाग्ने कारणले गर्दा स्वास्थ्य सामग्री ल्याउन ढिलो भएको बताउँछन् । त्यसकारण सामग्री कहिले आइपुग्छ भनेर भन्न सकिने अबस्था छैन ।
तत्काल आवश्यक पर्ने भएकाले लामो प्रक्रिया गर्दा समय लाग्ने भएर सेनालाई जिम्मा दिएको स्वास्थ्य सामग्री अहिलेसम्म आइपुगेको छैन।`
