काठमाडौं – ललितपुर महानगर प्रहरीले गरेका कामहरुको फोटो संग्रह ‘तस्वीरमा–नगर प्रहरी’ विमोचन गरिएको छ । ललितपुर महानगरपालिकाका मेयर चिरिबाबु महर्जनको प्रमुख आतित्थ्यतामा फोटो संग्रह पुस्तक विमोचन गरिएको हो ।
१५० पृष्ठको पुस्तिका एक कार्यक्रमकाबिच आज विमोचन गरिएको हो । पुस्तकमा महानगर प्रहरीले गरेका सुधार र विकासका कामहरुको फोटोहरु ‘पहिले र अहिले’ तुलना गरि राखिएको छ ।
कार्यक्रममा बोल्दै मेयर महर्जनले कसैको दवाव वा प्रभावमा नपरी काम गर्न नगर प्रहरीलाई निर्देशन दिएका छन् । उनले नागरिकको सेवामा केन्द्रीत भइ कसैको दवाव वा प्रभावमा नपरी काम गर्न नगर प्रहरीलाई निर्देशन दिएका हुन् ।
नगर प्रहरीले नागरिकमैत्री भएर सकारात्मक काम गरिरहेको भन्दै उनले महानगरबाट भएका निर्णय विवादरहित तवरले कार्यान्वयन गर्न सफल भएको समेत बताए ।
महर्जनले महानगरभित्रका मूर्त तथा अमूर्त सम्पदा संरक्षणमा शून्य सहनशीलताको नीतिअनुसार काम गरिरहेको जिकिर गरे । उनले आफ्नो क्षेत्रभित्र रहेका सम्पूर्ण सम्पदालाई सम्मान र व्यवस्थापन गर्दै सुधारका लागि अघि बढेको धारणा राखे ।
पुस्तकमा नगर प्रहरीले कार्यसम्पादनको सिलसिलामा गरेका सुधार कामहरूलाई समेटिएको तस्वीर समावेश गरिएको छ ।
मेयर महर्जनले महानगरभित्र अवैधानिक रुपमा गर्ने क्रियाकलापहरुलाई बन्द गर्न महानगर प्रहरीले सशक्त भएर काम गर्ने पनि उनले बताएका थिए ।
