शिवपुरी – सम्पादक समाज नेपालले ‘जलवायु परिवर्तनका प्रभावहरू न्यूनीकरणका लागि अपनाउनुपर्ने रणनीति’ का सम्बन्धमा एक दिने पदयात्रा कार्यक्रम सम्पन्न गरेको छ। समाजले शिवपुरी–८ स्थित लौके झरनासम्मको पदयात्रासंगै अवलोकन भ्रमण गरेको हो।
पदयात्रामा समाजका अध्यक्ष पुरु रिसाल, महासचिव श्याम डोटेल, वियोगी पत्रकार अध्ययन केन्द्रका संरक्षक किरण वैद्यलगायत राजधानी र नुवाकोटमा कार्यरत सम्पादक, पत्रकारहरु गरि एक सय भन्दा बढीको सहभागिता रहेको थियो। पत्रकारहरूलाई शिवपुरी गाउँपालिका अध्यक्ष गोविन्दप्रसाद थपलियाले स्वागत गरेका थिए।
पदयात्राका क्रममा गर्मीले आलसतालस भएका पत्रकार तथा अन्य आन्तरिक पर्यटकले ठूलो मुस्लो गरी झरेको झरनाको छिटाको स्पर्शसंगै आनन्द लिएका थिए ।
काठमाडौँ र नुवाकोटको सिमाना गुर्जे भन्ज्याङबाट पश्चिमपट्टि पर्ने करिब १५० फिट अग्लो सो झरना लौका आकारको रहेको कारण लौके झरना भन्ने गरिन्छ। त्यसबाट झरेको पानीको प्रभाव टाढासम्म पर्ने गरेको छ ।
नुवाकोटको सदरमुकाम विदुर र राजधानी काठमाडौंबाट नजिकै रहेको सो झरनामा दैनिक पाँच सय भन्दा बढी पर्यटक पुग्ने गरेको र शनिवार र बिदाको दिन त्यहा पुग्नेको संख्या अध्याधिक हुने गरेको शिवपुरी गाउँपालिका अध्यक्ष गोविन्दप्रसाद थपलियाले बताए।
शिवपुरी गाउँपालिकाले सिँढीसहितको पदमार्ग र सहज रूपमा हिँड्ने बाटो निर्माण गरिदिएपछि अन्तरिक पर्यटकको प्रमुख गन्तव्य बनेको हो। छहरे–टोखा सडकको बीचबाट सहजै झरनामा पुग्न सकिने भएपछि आन्तरिक पर्यटकको रोजाइमा लौकै झरना परेको छ। सो स्थान काठमाडौं र नुवाकोटको विदुरबाट समान ४५ मिनेटको दुरीमा पुग्न सकिन्छ।
