काठमाडौँ – संघीय संसद्ले आगामी बजेटका सिद्धान्त र प्राथमिकतामाथिको (प्रिबजेट) छलफल वैशाख २८ गतेबाट गर्ने भएको छ। लकडाउनकाबीच शुक्रबारबाट संसद्को बजेट अधिवेशन सुरु हुँदैछ। यसपटक बजेट अधिवेशन ढिलो गरी आह्वान भएकाले सचिवालयले नीति तथा कार्यक्रम अघि प्रिबजेट छलफल गर्ने कार्यसूची बनाएको छ।
बजेट प्रस्तुत गर्नु १५ दिन अगावै प्रिबजेट छलफल सक्नुपर्ने संसद् नियमावलीमा व्यवस्था अनुसार वैशाख मसान्तभित्र प्रिबजेट छलफल सम्पन्न गरिसक्नुपर्छ। जेठ १५ मा संसद्का दुवै सदनमा बजेट प्रस्तुत गर्नैपर्ने संवैधानिक व्यवस्था छ।
विश्व स्वास्थ्य संगठन (डब्लुएचओ)ले तोकेका मापदण्ड अन्तर्गत स्वास्थ्य सेवा विभागका विज्ञको सुझाव अनुसार अधिवेशनको सम्पूर्ण तयारी गरिएको सभामुख अग्नि सापकोटाको सचिवालयले जनाएको छ।
सांसदलाई नियम तथा आचारसंहिता
संसद् छिर्नु अघि कोरोना संक्रमण नभएको रिपोर्ट पेश गर्नुपर्ने
अधिवेशन अवधिभर एउटै सिटमा बस्नुपर्ने
आफू बसेको सिटमा रहेकै माइकबाटै बोल्नुपर्ने
संसद् भवन प्रवेश र फर्कंदा फरक–फरक ढोका प्रयोग गर्नुपर्ने
क्याण्टिन र सभाहल बाहिर अनावश्यक भीड गर्न नपाइने
बैठक प्रवेश गर्नुअघि अनिवार्य रूपमा साबुन पानीले हात धुनुपर्ने
बैठक अवधिभर मेडिकल मास्कको प्रयोग गर्नुपर्ने
घरमा होम क्वारेण्टाइनमा बस्नुपर्ने
तोकिएको कुर्सीमा मात्र बस्नुपर्ने
भौतिक दूरी कायम गरी समूहगत छलफल गर्ने
