तिहारको लागि सयपत्री फूल टिप्न काठमाडौं उपत्यकाका किसानहरूलाई चटारो छ। किसानहरू बिहानैदेखि आफ्नो बारीमा पुगेर फूल टिप्नमै व्यस्त हुने गरेका छन्।
यहाँ उत्पादन भएका फूलहरू काठमाडौं उपत्यकामै खपत हुने गरेका छन्। किसानहरूले फूल टिप्न सुरू गरेसँगै काठमाडौं महानगरपालिकाले स्वदेशमा उत्पादन भएका फूलको बिक्री वितरणलाई व्यवस्थित गर्न ४६ स्थानमा बिक्रीका लागि स्थान तोकिदिएको छ।
मेयर बालेन शाहले प्लास्टिकजन्य फूल तथा सजावटका सामग्री बिक्री वितरणमा रोकको घोषणा गर्दै स्वदेशमा उत्पादन भएका फूलको व्यापारलाई प्रवर्द्धनको व्यवस्था गर्न प्रबन्ध मिलाइएको फेसबुक स्टाटसमा उल्लेख गरेका छन्।
‘गत वर्ष पनि हामीले प्रदर्शनी मार्गको भृकुटीमण्डप, तीनकुने चौर, हाँडीगाउँ र बालाजु विष्णुमती करिडोरमा फूल बेच्ने स्थान मिलाइएको थियो। गतवर्षको सिकाइ र अभ्यासबाट यो वर्ष फूल विक्रेता किसानलाई सहज बनाउने प्रयास हुनेछ।
यसका लागि मल, मार्ट, पार्क, पार्टी प्यालेस, सेन्टरहरूमा व्यवस्था मिलाइएको छ। यसका लागि सम्पर्क व्यक्तिको नम्बर वा महानगर प्रहरीबलको क्षेत्रबाट पनि सहजीकरण काम हुनेछ।
