कास्की जिल्लाको मादी गाउँपालिकास्थित पर्यटकीय क्षेत्र हो सिक्लेस । गुरुङ कला संस्कृतिको जीवन्त अनुभव गर्न पाइने समुद्री सतहबाट २००० मिटर उचाइमा रहेको हजारौ वर्ष पुरानो गाउँ सिक्लेस जहाँ पुग्नासाथ ढुङ्गाले छाएको एवम् छापिएको गुजुमुच्च तर अत्यन्त सफा र सुन्दर नमुना बस्ती देख्न पाइन्छ जसलाई हेरेर पर्यटकले आफ्नो यात्राको थकाइ क्षणभरमै बिर्सने गर्छन् ।
नेपालकै ठूलो गुरुङ बस्तीका रुपमा रहेको यो गाउँ अन्नपूर्ण संरक्षण क्षेत्र अन्तर्गतको घलेखर्क सिक्लेस ईको ट्रेकभित्र पर्दछ । पोखरादेखि उत्तरपूर्वमा अवस्थित सिक्लेसमा अधिकांश गुरुङबस्ती छ । गुरुङ कला र संस्कृतिको अध्ययन तथा हिमाली दृश्यावलोकनका लागि सिक्लेसमा आन्तरिक तथा बाह्य पर्यटक पुग्ने गर्छन् ।
सिक्लेसबाट डेढ घण्टा उकालो हिँडेपछि दुई हजार ३५० मीटरको उचाइमा रहेको राइजिङ डाँडामा पुगिन्छ । त्यहाँबाट लमजुङ र अन्नपूर्ण हिमालको अवलोकन गर्न सकिन्छ । हर्पथर, लामाथरगैरीथर, धप्राङ्थर, सभाथर (कोइथर) सहित पाँच वटा टोल रहेको यहाँका स्थानीयको मुख्य पेशा कृषि र पर्यटन हो ।
केही वर्षयता आन्तरिक र बाह्य पर्यटकको आगमन बढ्न थालेपछि सिक्लेसमा होमस्टे र होटेलहरुको सङ्ख्या बढ्न थालेको छ । प्रकृति र संस्कृतिको धनी सिक्लेसमा स्थानीयको न्यानो आतिथ्यताले पर्यटकलाई लोभ्याउने गरेको छ ।
यातायातका साधन हुँदै पोखराबाट लगभग २ घण्टा ३० मिनेटको यात्रामा पुग्न सकिन्छ । पोखराको काहुँखोलाबाट लगभग ४० किमीको दूरीमा रहेको सिक्लेसमा यातायातको साधनबाट ढाँडबेसी, काभ्रेखोला, छाचोक, मेल्वो, थाक, तप्राङ, चिप्ली, खिलाङ र पार्चे हुँदै पुग्न सकिन्छ । यहाँ १२ महिना नै पर्यटक आउने गर्दछन् बिशेष गरि असोज, कार्तिक, मंसिरमा धेरै पर्यटक आउने गर्छन् ।
