जनकपुर — जनकपुरको मिथिला विहारी नगरपालिका-२ मा साप्ताहिक रूपमा लाग्ने हटिया (हाट बजार) स्थानीय उत्पादनहरू सहज रूपमा उपभोक्तासम्म पुर्याउने महत्वपूर्ण माध्यम बनेको छ। प्रत्येक मंगलबार, बिहीबार, र शनिबार सञ्चालन हुने यस हटियालाई स्थानीय पालिकाकै पहलमा व्यवस्थापन गरिएको छ, जसले किसान, व्यापारी र उपभोक्ताबीचको दूरी घटाउन महत्त्वपूर्ण भूमिका खेलेको छ।
बिहीबारको हटियामा तरकारी, मासु, माछालगायतका खाद्य वस्तुहरू बिक्री भइरहेको छ। हाल काउली प्रतिकिलो रु १०, चमसुरको साग प्रतिकिलो रु ५०, माछा प्रतिकिलो रु २००, खसिको मासु भाग लगाएको प्रतिकिलो रु ७००, र बोइलर कुखुराको मासु प्रतिकिलो रु २५० मा बिक्री भइरहेको छ।
यसैबीच, हटिया नजिकै रहेको मिथिला कल्चरल भिलेजमा आज शुक्रबारदेखि दुई दिने ‘हुचिल (उल्लु) महोत्सव’ आयोजना हुँदै छ। यो महोत्सव क्षेत्रीय जैविक विविधताको संरक्षण तथा मिथिला संस्कृतिमा उल्लुको स्थानबारे जनचेतना जगाउने उद्देश्यले गरिएको हो। आयोजकहरूका अनुसार महोत्सवमा स्थानीय कलाकारहरूका सांस्कृतिक प्रस्तुति, चित्रकला प्रदर्शनी, र प्रकृतिसँग सम्बन्धित विविध कार्यक्रमहरू हुनेछन्।
स्थानीय उत्पादन प्रवर्द्धन र संस्कृतिको जगेर्ना गर्ने यी गतिविधिहरूले जनकपुरवासीलाई आर्थिक र सांस्कृतिक रूपमा सबल बनाउने अपेक्षा गरिएको छ।
