काठमाडौं – म्यानमारले काठमाडौँमा सुरु अन्तर्राष्ट्रिय महिला च्याम्पियनसिपमा विजयी सुरुवात गरेको छ। त्रिपुरेश्वरस्थित दशरथ रंगशालामा सोमबार भएको पहिलो खेलमा लेवनानलाई ३–१ गोल अन्तरले पराजित गर्दै म्यानमारले प्रतियोगितामा सुखद सुरुवात गरेको हो।
खेलको पहिलो हाफ गोलरहित बराबरीमा सकिएको थियो। दोस्रो हाफमा म्यानमारले उत्कृष्ट प्रदर्शन गर्दै तीन गोल गर्न सफल रह्यो। खेलको ५७औं मिनेटमा कप्तान विन थिङगी टुनले गोल गर्दै म्यानमारलाई अग्रता दिलाइन्। उनले मे थे मोनको पासलाई उत्कृष्ट नियन्त्रणमा लिँदै बललाई पोष्टको जाली चुमाइन्।
तर, म्यानमारको अग्रता लामो समय टिक्न सकेन। खेलको ६०औं मिनेटमा लेवनानकी लायला स्कन्दरले बराबरी गोल फर्काइन्। उनले डिबक्स बाहिरबाट गोलरक्षक अगाडि बढेको मौकामा डिफेन्डर र गोलरक्षकलाई बिट गर्दै खाली पोष्टमा गोल गरेकी थिइन्।
म्यानमारले पुनः खेलमा पकड जमाउँदै ७२औं मिनेटमा अग्रता दोब्बर पार्यो। यु पेर खिनको लामो क्रसलाई सवि यी ले हेडर मार्फत गोल गर्दै टोलीलाई २-१ को अग्रता दिलाइन्। खेलको ७५औं मिनेटमा सान थ को गोलमार्फत म्यानमारले ३-१ को जित सुनिश्चित गर्यो।
यो जितसँगै म्यानमारले अंक तालिकामा ३ अंक जोडेको छ।
यता, आजै हुने दोस्रो खेलमा घरेलु टोली नेपालले कीर्गिस्तानविरुद्ध प्रतिस्पर्धा गर्नेछ। सो खेल साँझ ६ बजे सुरु हुनेछ। नेपाली टिमले घरेलु मैदानको फाइदा उठाउँदै उत्कृष्ट प्रदर्शन गर्ने अपेक्षा गरिएको छ।
