काठमाडौँ – प्रधानमन्त्री केपी शर्मा ओलीको ७४औँ जन्मदिनको अवसरमा केक काटेर ‘केपी ओली कप’ फुटबल च्याम्पियनसिपको तेस्रो संस्करणको शुभारम्भ गरिएको छ। आइतबार एन्फा कम्प्लेक्समा आयोजित कार्यक्रममार्फत ओलीले केक काट्दै प्रतियोगिताको उद्घाटन गरेका हुन्।
राष्ट्रिय युवा संघ नेपालको आयोजनामा काठमाडौँमा जारी प्रतियोगितामा दुई विदेशीसहित ९ टोली सहभागी छन्। उद्घाटन खेलमा उज्बेकिस्तानको ब्ल्याक बुल्स एफसी र एपीएफ एफसी आमनेसामने हुने जनाइएको छ।
प्रतियोगिताको विजेता टोलीले १५ लाख ११ हजार १ सय ११ रुपैयाँ पुरस्कार प्राप्त गर्नेछ भने उपविजेताले ५ लाख रुपैयाँ हात पार्नेछ। आयोजकले प्रतियोगितालाई भव्य र प्रतिस्पर्धात्मक बनाउन विशेष तयारी गरिएको जनाएको छ।
