काठमाडौं — चित्रकार सुमन राईको “मौनता भित्र कथा” एकल चित्र प्रदर्शनी सुरु भएको छ। ललितपुरको एम क्यूब आर्ट ग्यालरी, चाकुपाटमा मंगलबारदेखि सुरु प्रदर्शनीको औपचारिक उद्घाटन बरिष्ठ चित्रकार मानिष लाल श्रेष्ठले गरेका हुन्।
सृजना कलेज अफ फाइन आर्ट्सबाट स्नातक गरेका राईको कला नेपाली मौलिकता, सांस्कृतिक सम्पदा र दैनिक जीवनका मौन भावहरूमाथि केन्द्रित छ। “मौनतामा कथा” शीर्षकमा उनले यथार्थ र अमूर्तता (realism and abstraction) को संयोजन गर्दै मानव अनुहारका भाव, पुराना पर्खालका बनावट, र सांस्कृतिक प्रतीकहरूको माध्यमबाट मौनतामा लुकेका कथाहरू उजागर गरेका छन्।
उद्घाटन समारोहमा बोल्दै बरिष्ठ कलाकार मानिष लाल श्रेष्ठले सुमन राईको कला नेपाली समाजको दृश्य भाषामा गरिएको गहिरो अध्ययन भएको बताए। “उनका चित्रहरू हेर्दा मौनताभित्र लुकेका कथा देख्न सकिन्छ,” उनले भने।
कलाकार राईका अनुसार “मौनता भित्रको कथा” श्रृंखला मानिस, समय, र संरचनाबीचको सम्बन्धबारे प्रश्न उठाउँछ। “हरेक नजर, बनावट र रंगमा एउटा कथा लुकेको हुन्छ,” उनले बताए।
प्रदर्शनीमा मानव संवेदना, सांस्कृतिक स्मृति, र नेपाली जीवनशैलीका विविध पक्ष समेटिएका चित्रहरू समावेश छन्। विशेषगरी पुराना मूर्तिहरू, बालबालिकाका भाव, र समयले छोएका अनुहारहरू उनका प्रमुख विषयवस्तु हुन्। प्रदर्शनी आजदेखि बैशाख ९ गतेसम्म सञ्चालनमा रहनेछ। राईले २०२३ को राष्ट्रिय कला प्रदर्शनीमा कोशी प्रदेशबाट प्रादेशिक पुरस्कार समेत प्राप्त गरेका छन्।
