काठमाडौँ – चैत १५ गते काठमाडौँको तीनकुनेमा भएको हिंसात्मक घटनाका मुख्य योजनाकार दुर्गा प्रसाई भारतको आसाम राज्यमा पक्राउ परेका छन्।
प्रहरी स्रोतका अनुसार उनी भारतको आसाम राज्यबाट पक्राउ परेका हुन् र हाल काकडभिट्टा नाका हुँदै नेपाल ल्याइँदै छन्। घटनापछि फरार रहेका प्रसाईको लोकेसन विभिन्न माध्यमबाट पत्ता लगाइएको थियो। पक्राउबारे प्रसाईको परिवारले पनि पुष्टि गरेको छ। यद्यपि, उनका परिवारका सदस्यले भने उनी आफैं सुरक्षा खोज्दै आसाम प्रहरीको सम्पर्कमा पुगेको दाबी गरेका छन्।
तीनकुनेमा प्रसाईको नेतृत्वमा भएको प्रदर्शनले हिंसात्मक रुप लिएपछि दुई जनाको मृत्यु भएको थियो भने दर्जनौं सर्वसाधारण र सुरक्षाकर्मी घाइते भएका थिए। साथै, त्यहाँ व्यापक तोडफोड, आगजनी र लुटपाटसमेत भएको थियो।
फरार भएपछि पनि दुर्गा प्रसाईले सामाजिक सञ्जालमा दुई वटा भिडिओ सार्वजनिक गर्दै आफ्नो पक्ष राख्ने प्रयास गरेका थिए। तर प्रहरीको व्यापक खोजी र सुराकीका आधारमा अन्ततः उनी पक्राउ परेका हुन्।
प्रसाईसँगै भारत भागेका उनका सहयोगीहरू भने अहिले आफैं नेपाल फर्कंदै गरेको बताइएको छ।
प्रहरीले घटनामा संलग्न अन्य व्यक्तिहरूको पनि खोजी तथा अनुसन्धानलाई तीव्र बनाएको छ। तीनकुने घटनाको सम्पूर्ण अनुसन्धानपछि दोषीमाथि कानुनी कारबाही गरिने प्रहरीले जनाएको छ।
