काठमाडौं – ललितपुरको ग्वार्को चोकमा निर्माण भएको ओभरपास सञ्चालनमा आएको छ। प्रधानमन्त्री केपी शर्मा ओलीले उद्घाटन गरेसँगै ओभरपासबाट औपचारिक रूपमा सवारी साधन सञ्चालनमा आएका हुन्।
काठमाडौं उपत्यकाको व्यस्त चोकमध्ये एक ग्वार्कोमा निर्माण भएको यो ओभरपास चक्रपथको ट्राफिक व्यवस्थापनमा सहज हुने अपेक्षा गरिएको छ। चार लेनको ओभरपासको चौडाइ १०.२ मिटर रहेको छ। ओभरपास अन्तर्गत कोटेश्वरतर्फ ३२० मिटर लामो र्याम्प तथा सातदोबाटोतर्फ १८५ मिटर लामो र्याम्प निर्माण गरिएको छ।
निर्माण कार्य २०७८ फागुनमा सुरु भएको हो। आशिष–समानान्तर–रेलिगेर जेभीले १७ करोड ६ लाख ८८ हजार रुपैयाँमा ठेक्का लिएको ओभरपास दुई वर्षमै सक्ने लक्ष्य थियो। तर, समयमै निर्माण नपुगेपछि दुई पटक म्याद थप गर्नुपरेको थियो। अन्ततः पुस १० गतेबाट जरिवाना तिराउँदै निर्माण व्यवसायीलाई काममा लगाइएको थियो।
ग्वार्को ओभरपासले पश्चिमी काभ्रेपलाञ्चोक तथा पूर्वी ललितपुर जोड्ने मुख्य मार्गको रूपमा कार्य गर्नेछ। सातदोबाटो, बालकुमारी, मंगलबजारतर्फ गएका तथा सोही बाटो भएर फर्कने सवारीहरूको चाप व्यवस्थित गर्न यो ओभरपास निर्माण गरिएको हो। अब मंगलबजार र इमाडोलतर्फ जाने सवारी साधनहरू ओभरपासमुनिबाट सञ्चालन हुनेछन् भने कोटेश्वर र सातदोबाटो जाने गाडीले ओभरपास प्रयोग गर्न सक्नेछन्।
स्थानीय तथा नियमित यात्रुहरूका लागि यो संरचना ट्राफिक सहज बनाउने महत्वपूर्ण पूर्वाधार हुने विश्वास लिएको छ।
