रसुवा, नेपाल – रसुवा जिल्लाको आमाछोदिङमो गाउँपालिका–३ मा रहेको गत्लाङ गाउँ समुन्द्री सतहदेखि २३ सय मिटरमा रहेको यस गाउँ एक सुन्दर पर्यटकीय स्थल हो ।
नेपाल–चीन सीमानजिकै रहेको रसुवाको ऐतिहासिक गत्लाङ गाउँ तोरी फुलेका सुनौलो खेत, हिमाली भू–दृश्य र वसन्त ऋतुमा फुल्ने रुखहरूले गाउँको प्राकृतिक सुन्दरतामा थप आकर्षण दिएको छ।
तामाङ बस्तीको मौलिक वास्तुकला, संस्कृति र जीवनशैली अझै पनि यस गाउँमा जगेर्ना हुँदै आएको देखिन्छ। ग्रामीण जीवन, गाउँले वातावरण र सांस्कृतिक सम्पदाले समृद्ध गत्लाङ गाउँलाई ‘एसियाली जीवनशैली’ को प्रत्यक्ष प्रतीकका रूपमा चिनाइएको छ। परम्परागतरूपमा काठले मात्र बनाइएको छाना र एउटै पर्खालबाट बनेको यस गाउँ विश्वसामु परिचित गराउन आवश्यक छ । विशुद्ध तामाङ जातिको बसोबास रहेको यहाँ करिव ५ सय घरधुरी रहेको छ ।
स्थानीयवासीले नयाँ वर्ष तथा वसन्त पर्व (स्प्रिङ फेस्टिभल) विशेष उल्लासका साथ मनाउने गरेका छन्। यस अवसरमा गाउँका परम्परागत नृत्य, गीत र तामाङ संस्कृतिका विभिन्न झलक पर्यटक र दर्शकका लागि मुख्य आकर्षण हुने गर्छन्।
विशेष गरी यहाँको आलु, सिमी, मुसुरोको दाल प्रख्यात छ ।प्राकृतिकरूपमा मनमोहक यस ठाउँ पुग्नेले स्वर्गीय आनन्द लिन सक्छन् । राजधानी काठमाडौंबाट एकै दिनमा कालो गाउँ पुग्न सकिन्छ । यहाँ धेरै मानिसले पर्यटनका लागि तामाङ सम्पदा मार्गमा पर्ने गत्लाङ, पार्वती कुण्ड, थुमन, नागथली तातोपानी लगाएका ठाउँको समेत भ्रमण गर्न सक्छन् ।
