काठमाडौं – कोटेश्वर ट्राफिक प्रहरी प्रभागका ट्राफिक प्रहरीहरू काममा फर्किएका छन्। जेनजी आन्दोलनको क्रममा क्षतिग्रस्त भवन स्थानीयवासी र व्यवसायीहरूले सरसफाई गर्दै आज आइतबार बिहान एक कार्यक्रमका बीच कार्यालयमा स्वागत गरेका हुन्।
व्यवसायीहरूले फुलमाला र खादा अर्पण गरेर खुशी प्रकट गरेका थिए। “सडकमा प्रहरी देख्दा विश्वास बढ्छ, कामकाज पनि सामान्य हुँदै गएको अनुभूति भयो,” एक स्थानीय व्यापारीले भने।
कोटेश्वर क्षेत्रमा आजदेखि ट्राफिक प्रहरी पुनः ड्युटीमा फर्किएका छन्। सडकमा उनीहरूको उपस्थितिपछि यातायात सञ्चालन सहज बन्दै गएको छ।
आन्दोलनका क्रममा क्षतिग्रस्त बनेको प्रहरी प्रभागमा अझै मर्मत कार्य जारी भए पनि ट्राफिक व्यवस्थापनलाई प्राथमिकता दिँदै प्रहरी परिचालन गरिएको हो। ट्राफिक प्रहरीले यात्रु र चालकलाई संयमित रहन तथा नियम पालना गर्न आग्रह गरेको छ।
