काठमाडौं – नेपाल परिवार दलको केन्द्रीय कार्य सम्पादन समितिको बैठक शुक्रबार काठमाडौंमा सम्पन्न भएको छ। दलका अध्यक्ष एकनाथ ढकालको अध्यक्षतामा बसेको बैठकले हालको राजनीतिक घटनाक्रम, जेनजी आन्दोलन र अन्तरिम सरकारप्रति आफ्ना धारणा सार्वजनिक गरेको छ।
बैठकले भदौ २३ र २४ गते भएको जेनजी आन्दोलनमा उठाइएका भ्रष्टाचार अन्त्य, सुशासन, जवाफदेहिता र पारदर्शिताका मागलाई जायज ठहर गर्दै सरकारले सम्बोधन गर्नुपर्ने निष्कर्ष निकालेको छ। त्यस्तै, अन्तरिम प्रधानमन्त्री सुशिला कार्कीको नेतृत्वमा छ महिनाभित्र हुने भनिएको निर्वाचनलाई सकारात्मक लिँदै तोकिएको समयमा स्वतन्त्र, निष्पक्ष र धाँधलीविहीन चुनाव सम्पन्न गर्न आग्रह गरिएको छ।
बैठकले आन्दोलनमा ज्यान गुमाउनेप्रति श्रद्धाञ्जली अर्पण गर्दै घाइतेहरूको स्वास्थ्य लाभको कामना गरेको छ। साथै, छानबिन आयोगले तोडफोड, आगजनी र सम्पत्ति लुटपाटबारे सत्यतथ्य सार्वजनिक गरी दोषीलाई कानुनी कारबाही गर्नुपर्नेमा जोड दिएको छ।
दलले नेपालको संविधानले स्थापित गरेको संघीय लोकतान्त्रिक गणतन्त्र, धर्मनिरपेक्षता र सामाजिक न्यायलाई थप संस्थागत गर्दै ‘अग्रपंथी लोकतन्त्र’लाई वैचारिक मार्गका रूपमा अघि सार्ने निर्णय गरेको छ। बैठकले नेपाललाई शान्तिक्षेत्र घोषणा गर्न अन्तरिम सरकारसँग आग्रह गरेको छ।
जेनजी पुस्ताको भावनालाई कदर गर्दै पार्टीका विभिन्न तहका समितिहरूमा उनीहरूको सहभागिता बढाउने निर्णय समेत भएको छ। साथै, सहमहामन्त्री मिलन राजबंशीको संयोजकत्वमा जेनजी आन्दोलनकारीसहित सरोकारवालासँग संवाद गर्न वार्ता टोली गठन गरिएको छ।
बैठकले दशैं, तिहार, नेपाल संवत र छठ पर्वको अवसरमा सम्पूर्ण नेपालीहरूलाई शुभकामना पनि व्यक्त गरेको छ।
