काठमाडाै नवघोषित कुमारी आर्यतारा शाक्यलाई मंगलबार विधिवत् रूपमा कुमारीघरमा प्रवेश गराई आसन ग्रहण गराइएको छ। इटुम्बहालकी साढे दुई वर्षीया आर्यतारालाई शुभसाइतमा विशेष बाजागाजासहित तलेजु भवानीको दर्शन गराई कुमारीघर भित्र्याइएको हो।
कुमारीलाई जीवित देवीका रूपमा पूज्ने परम्परा तत्कालीन राजा जयप्रकाश मल्लले सुरु गरेका हुन्। गुठी संस्थान, पञ्चांग निर्णायक समिति र सरोकारवालासँगको परामर्शपछि आर्यतारालाई नयाँ कुमारीका रूपमा चयन गरिएको हो। नयाँ कुमारीलाई आसन ग्रहण गराएसँगै पूर्वकुमारी तृष्णा शाक्यलाई विधिवत् रूपमा विदाई गरिएको छ।
कोजाग्रत पूर्णिमाका दिन राष्ट्रप्रमुखले पनि कुमारीको दर्शन गर्ने परम्परा छ।
