काठमाडौँ– नेपाली सेनाद्वारा प्रकाशित ‘प्राड विवाक जर्नल–२०८२’ आज एक विशेष समारोहका बीच विमोचन गरिएको छ। जङ्गी अड्डामा आयोजित उक्त कार्यक्रममा प्रधान न्यायाधीश प्रकाशमान सिंह राउत र प्रधान सेनापति अशोक राज सिग्देलले संयुक्त रूपमा जर्नलको विमोचन गर्नुभयो।
सैनिक न्याय प्रणालीसम्बन्धी अध्ययन, अनुसन्धान र विमर्शलाई सुदृढ बनाउन जारी गरिएको यो जर्नल श्री सेना प्राड विवाक स्थापनाको ६३औं वार्षिकोत्सवको अवसरमा प्रकाशित गरिएको हो।
सो अवसरमा सैनिक विशेष अदालतका पूर्व सदस्य तथा पूर्व रक्षा सचिव (हाल गृह सचिव) श्री रामेश्वर दंगाललाई सैनिक न्याय प्रणालीको विकासमा पुर्याएको योगदानका लागि सम्मानित गरिएको थियो।
कार्यक्रममा माननीय न्यायाधीशहरू, नेपाल सरकारका सचिवज्यूहरू, नेपाली सेनाका रथीवृन्द तथा विभिन्न तहका अधिकृतहरूको सहभागिता रहेको थियो।
