काठमाडौं – नेपाल प्रहरीका डिएसपीलाई सरुवा गराइदिने भन्दै धम्की दिने दोहोरी साँझ व्यवसायी अशोक गिरी समूहको कुटपिटबाट एक युवक गम्भीर घाइते भएका छन् ।
जमलमा दोहोरी साँझ चलाउँदै आएका सिन्धुपाल्चोकका अशोक गिरीले सञ्चालन गर्दै आएको दोहोरी साँझबाट बाहिर निस्कन लागेका एक ग्राहकलाई उनीद्वारा संरक्षित ‘गुण्डा’हरुले कुटपिट गर्दा टाउकोमा प्रहार गरी गम्भीर घाइते बनाएका छन् ।
राजधानीको विश्वज्योति मलको माथिल्लो तलामा टप दरबार रोधी क्लब नामको दोहोरी सञ्चालन गर्दै आएका गिरीको समूहले आफ्नो दोहोरीमा आएका ग्राहकको टाउको नै फुटाउने गरी आक्रमण गरेर गम्भीर घाइते भएका छन् ।
त्रिचन्द्र क्याम्पसका विद्यार्थी नेतासमेत रहेका आशिष गौतमलाई गिरीको संरक्षणमा रहेका समूहका युवाले कुटपिट गरेको खुलेको छ । उनीहरुले ती युवकलाई कुटपिट गरेपछि उपचार गराउनुको उल्टै प्रहरीको धम्की दिएर भागेको जनाइएको छ । त्यसपछि ती पीडित युवकले प्रहरीलाई १०० मा फोन गरेर आफू कुटिएको बताएपछि प्रहरीले गिरी समूहका खगेन्द्र औडी भनिने युवकलाई प्रहरीले नियन्त्रणमा लिएको छ ।
केही वर्ष अघिदेखि जमलको मायालु सेन्टरमा दोहोरी चलाउँदै आएका गिरी गुण्डागर्दीका कारण पटकपटक पक्राउ पर्दै आएका व्यक्ति हुन् । पछिल्लो समय गिरीले दोहोरीको स्थान परिवर्तन गरेर विश्वज्योति माथिल्लो तलामा दोहोरी सञ्चालन गर्दै आएका छन् ।
कुटाई खाएका युवाहरुले आफूलाई कुटपिट गर्नेविरुद्ध प्रहरीमा उजुरी दिएको जनाइएको छ । काठमाडौं प्रहरीका प्रवक्ता एसपी पवनकुमार भट्टराई अनुसार दोहोरी सञ्चालक अशोक गिरीका विरुद्ध जाहेरी परेको छ ।
गिरीले यसअघि पनि दोहोरीमा आउने ग्राहकहरुलाई प्रहरीका उच्च अधिकारीको नाम लिएर धाक धम्की दिँदै आउने गरेको पनि जनाइएको छ ।
उनी यसअघि २०८० माघमा गुण्डागर्दीकै क्रममा ६ हजारको बिललाई ६० हजार बनाएर ठगी गरेको आरोपमा उजुरी परेपछि पक्राउ परेका थिए । उनले तत्कालिन दरबारमार्गवृत्तका डिएसपी गोविन्द थापालाई आफूलाई पक्राउ गरेमा प्रहरीका उच्च अधिकारीको नाम लिँदै सरुवा गराईदिने धम्की दिएका थिए । तर, डिएसपी थापाले गिरीविरुद्ध परेको उजुरीको आधारमा त्यतिबेला पक्राउ गरेको थियो ।
