काठमाडौँ — नेपालमै पहिलोपटक ड्रोन प्रविधिबाट खिचिएका तस्बिरहरूको विशेष फोटो प्रदर्शनी भोलिदेखि नेपाल पर्यटन बोर्डमा सुरु हुने भएको छ। तीन दिनसम्म चल्ने उक्त प्रदर्शनी फोटो पत्रकार नबिन बाबु गुरुङको एकल ड्रोन फोटो प्रदर्शनी हो।
प्रदर्शनीमा नेपालको विभिन्न भू–भागमा रहेका पर्यटकीय सम्भावना बोकेका तर अझै पर्याप्त रूपमा चर्चामा नआएका गाउँ–बस्ती, मनमोहक प्राकृतिक दृश्य तथा मौलिक चाडपर्वहरू झल्किने ड्रोन तस्बिरहरू समावेश गरिनेछ।
नेपालका विभिन्न जिल्लामा रहेका पर्यटकीय गन्तव्य तथा प्रचार–प्रसारको पर्खाइमा रहेका स्थानहरूको आकाशबाट देखिने दृश्य प्रस्तुत गर्ने उद्देश्यले प्रदर्शनी आयोजना गरिएको फोटो पत्रकार गुरुङले जानकारी दिए। उनका अनुसार प्रदर्शनीमा केही पहिले नै लोकप्रिय पर्यटनस्थलका तस्बिरहरूका साथै अहिले जुर्मुराउँदै गरेका र भविष्यमा पर्यटनको प्रखर सम्भावना बोकेका गाउँ–ठाउँका दृश्यहरू पनि समेटिएका छन्।
“चराहरूले देख्ने दृष्टिकोणबाट यी पर्यटकीय क्षेत्रहरू कस्तो देखिन्छन् भन्ने अवधारणामा आधारित भएर ड्रोनमार्फत कैद गरिएका तस्बिरहरू प्रदर्शनीमा प्रस्तुत गरिएको छ,” गुरुङले बताए।
नेपाल पर्यटन बोर्डको सहकार्यमा पिजे क्लब नेपाल र तमु सञ्चारकर्मी संघ नेपालले संयुक्त रूपमा प्रदर्शनी आयोजना गर्न लागेका हुन्। नेपालमा ड्रोन प्रविधिबाट खिचिएका तस्बिरहरूको यस्तो किसिमको प्रदर्शनी पहिलोपटक आयोजना हुन लागेको आयोजकको दाबी छ।
यस प्रदर्शनीले नेपाली पर्यटनका नयाँ आयाम उजागर गर्दै आन्तरिक तथा बाह्य पर्यटक आकर्षणमा टेवा पुग्ने अपेक्षा गरिएको छ। प्रदर्शनी आइतबारसम्म चल्नेछ।
