भक्तपुर- भक्तपुरको हनुमानघाटस्थित त्रिवेणीधाममा आजदेखि एक महिनासम्म सञ्चालन हुने माधवनारायण मेला एवं व्रत सुरु भएको छ। नेपाल संवत्को आठौँ शताब्दीबाट सुरु भएको विश्वास गरिने यो मेला पौष शुक्ल पूर्णिमादेखि माघ शुक्ल पूर्णिमासम्म चल्ने गर्दछ।
व्रतालुले त्रिवेणीधाममा स्नान गरी सूर्यलाई अर्घ अर्पण गर्दै माधवनारायणको पूजा गरेपछि व्रत सुरु गरेका छन्। शिलालेखअनुसार तत्कालीन राजा रणजित मल्ल स्वयं उपस्थित भई व्रत प्रारम्भ गरेको उल्लेख छ।
मेला अवधिभर दैनिक पूजा, माधवनारायणको कथा वाचन तथा त्रिवेणी कुण्डमा स्नान गरिन्छ। यस वर्ष महिला–पुरुष गरी ३५ जनाले व्रत बसेका छन्, जसमा सात जना महिलाले त्रिवेणीधाममै बसेर व्रत पूरा गर्ने भएका छन्।
हनुमन्ते खोलामा ढल मिसिएका कारण व्रतालुको सङ्ख्या घट्दै गएको गुनासो गरिएको छ। मेला सञ्चालनका लागि भक्तपुर नगरपालिकाले अस्थायी स्नानको व्यवस्था मिलाएको जनाएको छ।
