काठमाडौं- नेपाल शैक्षिक परामर्श संघ (ईक्यान–ECAN) को आगामी २०औँ साधारणसभा तथा महाधिवेशनबाट नयाँ नेतृत्व चयन हुने तयारी तीव्र बनेको छ। वर्तमान अध्यक्ष शेषराज भट्टराई नेतृत्वको कार्यसमितिको दुईवर्षे कार्यकाल समाप्त भएसँगै आगामी पुस २८ गते हुने निर्वाचनलाई लक्षित गर्दै संगठनभित्र चुनावी गतिविधि बढ्दै गएको छ।
अध्यक्ष पदका लागि दुई मुख्य प्यानलबीच प्रत्यक्ष प्रतिस्पर्धा हुने अपेक्षा गरिएको छ। निर्वाचनमा दीपकराज भुषाल प्यानल र लक्ष्मण पौडेल प्यानल आमनेसामने हुने भएका छन्। अध्यक्षसहित १८ पदका लागि उम्मेदवारहरू मैदानमा उत्रिँदा ईक्यानभित्रको राजनीतिक सरगर्मी थप बढेको छ।
यसै क्रममा काभ्रेका युवा शैक्षिक परामर्श व्यवसायी नवराज नेपाल (NABU) ले ईक्यान केन्द्रीय सदस्य पदमा आफ्नो उम्मेदवारी औपचारिक रूपमा घोषणा गर्नुभएको छ। उहाँ लामो समयदेखि शैक्षिक परामर्श क्षेत्रमा सक्रिय रहँदै काभ्रे जिल्लामा संगठन विस्तार, सदस्य एकता सुदृढीकरण, कानुनी प्रक्रिया तथा लाइसेन्स व्यवस्थापनमा उल्लेखनीय योगदान पुर्याउँदै आउनुभएको छ।
नवराज नेपालको उम्मेदवारी घोषणासँगै उहाँले युवा नेतृत्व विकास, सदस्यमैत्री सेवा प्रवाह, स्पष्ट नीति–नियमको प्रभावकारी कार्यान्वयन तथा ईक्यानलाई अझ व्यावसायिक, उत्तरदायी र विश्वासिलो संस्था बनाउने प्रतिबद्धता व्यक्त गर्नुभएको छ।
हालसम्म केन्द्रीय सदस्य पदका लागि नवराज नेपालसहित ८ जनाले उम्मेदवारी घोषणा गरिसकेका छन्। ईक्यानमा देशभर सात सयभन्दा बढी शैक्षिक परामर्श व्यवसायी आवद्ध छन् भने आठवटा शाखा सञ्चालनमा छन्।
