काठमाडौं – आगामी राष्ट्रिय सभा निर्वाचनमा प्रमुख चार राजनीतिक दलबीच तालमेल हुने भएको छ । नेपाली कांग्रेस, नेकपा एमाले, नेपाली कम्युनिस्ट पार्टी (नेकपा) र जनता समाजवादी पार्टी (जसपा) नेपालबीच निर्वाचनमा सहकार्य गर्ने सहमति भएको कांग्रेस नेता रमेश लेखकले जानकारी दिए ।
उनका अनुसार प्रारम्भिक सहमतिअनुसार कांग्रेस र एमालेले समान रूपमा ७–७ सीट लिने, नेकपाले ३ सीट र जसपा नेपालले १ सीट पाउने समझदारी बनेको छ । यद्यपि नेकपाले भने चार सीटको माग गरिरहेको बताउँदै नेता लेखकले बेलुकासम्ममा सबै दल सहमतिमा आउने विश्वास व्यक्त गरे ।
‘कांग्रेस र एमालेले ७–७ सीटमा चित्त बुझाइसकेका छन् । नेकपाले चार सीटको माग गरेको छ, तर उहाँहरू पनि बेलुकासम्ममा सहमतिमा आउनुहुन्छ भन्ने विश्वास छ,’ लेखकले भने ।
उनका अनुसार बाँकी विषयहरू टुंग्याउन दलहरूबीच निरन्तर छलफल भइरहेको छ र आज बेलुकासम्म अन्तिम सहमति सार्वजनिक गरिने तयारी छ ।
राष्ट्रिय सभाका रिक्त १८ सीटका लागि माघ ११ गते निर्वाचन हुन लागेको छ । निर्वाचनमा तालमेल गरेर जाने निर्णयसँगै दलहरू उम्मेदवार चयन र चुनावी रणनीति तय गर्न व्यस्त बनेका छन् ।
