पर्यटक लोभ्याउदै कोन्ज्योसोमको तीन मूर्ति बुद्ध पार्क (तस्वीरहरू)

राजधानी काठमाडौं नजिकै रहेको ललितपुरको कोन्ज्योसोम पछिल्लो समय आकर्षक पर्यटकीय गन्तव्यका रूपमा विकसित हुँदै गएको छ। हराभरा जंगल, जैविक विविधता, धार्मिक–सांस्कृतिक पहिचान र प्राकृतिक सौन्दर्यका कारण यहाँ आन्तरिक तथा बाह्य पर्यटकको आगमन बढ्दै गएको हो।

फूलबारी डाँडामा अवस्थित कोन्ज्योसोम प्रतिमा (बुद्धका तीन मूर्ति), नल्लु भञ्ज्याङबाट देखिने उपत्यकाको दृश्य, पाथीभरा मन्दिर, गुप्तेश्वर गुफा र तामाङ संस्कृति यहाँका प्रमुख आकर्षण हुन्। सातदोबाटोबाट करिब २२ किलोमिटर दूरीमा रहेको कोन्ज्योसोम सार्वजनिक तथा निजी सवारीमार्फत सहजै पुग्न सकिन्छ।

गाउँपालिका अध्यक्ष कृष्णमान लामाका अनुसार पर्यटकीय पूर्वाधार विकास र प्रचारप्रसारलाई प्राथमिकता दिँदै कोन्ज्योसोमलाई व्यवस्थित पर्यटकीय गन्तव्यका रूपमा विकास गर्ने काम भइरहेको छ। तामाङ समुदायको आतिथ्य, स्थानीय परिकार र होमस्टे सुविधाले पर्यटकलाई थप आकर्षित गरिरहेको छ।