काठमाडौं – पाकिस्तानमा सञ्चालन भएको नवौं ‘पाकिस्तान आर्मी टिम स्पिरिट’ प्रतियोगितामा नेपाली सेनाको टोलीले सर्वाधिक अंक प्राप्त गर्दै स्वर्ण पदकसहित प्रथम स्थान हासिल गरेको छ।
यहि माघ २२ गतेदेखि २४ गतेसम्म पञ्जाब प्रान्तको खारियाँस्थित नेशनल काउन्टर टेररिज्म सेन्टर (एनसिटिसी) मा सम्पन्न उक्त अन्तर्राष्ट्रिय सैन्य अभ्यासमा पाकिस्तानसहित १७ राष्ट्रका ३८ वटा सैनिक टोलीहरूको सहभागिता रहेको थियो।
प्रतियोगितामा सहभागी टोलीहरूबीच शारीरिक सहिष्णुता, मानसिक दृढता, पेसागत ज्ञान, रणकौशल तथा सामूहिक समन्वय क्षमताको परीक्षण गरिएको थियो। कडा प्रतिस्पर्धाबीच नेपाली सेनाले उत्कृष्ट प्रदर्शन गर्दै समग्रतामा उच्च अंकसहित उपाधि जित्न सफल भएको हो।
सन् २०१६ देखि वार्षिक रूपमा सञ्चालन हुँदै आएको यस अन्तर्राष्ट्रिय प्रतियोगितामा नेपाली सेनाले यसअघि पनि सन् २०२२ र २०२५ मा स्वर्ण पदक हासिल गरिसकेको छ। पछिल्लो सफलतासँगै अन्तर्राष्ट्रिय स्तरमा नेपाली सेनाको व्यावसायिक दक्षता र क्षमता पुनः स्थापित भएको छ।
