ललितपुर — हायर ग्राउन्ड नेपालद्वारा आयोजित ‘फन रन २०८२’ शनिबार जावलाखेल फुटबल मैदानमा सम्पन्न भएको छ। कार्यक्रममा २,००० भन्दा बढी सहभागीहरूको उत्साहजनक उपस्थिति रहेको थियो।
अन्तर्राष्ट्रिय महिला महिनाको अवसरमा आयोजना गरिएको ५ किलोमिटर दौड तथा हिँडाइ कार्यक्रममा विभिन्न उमेर समूह र पृष्ठभूमिका व्यक्तिहरू सहभागी हुँदै महिला सशक्तिकरण, समावेशिता, समानता र सामाजिक एकताको सन्देश प्रवाह गरिएको आयोजकले जनाएको छ। कार्यक्रमले लैङ्गिक असमानता न्यूनीकरण तथा सामाजिक र संरचनात्मक अवरोधहरू हटाउने विषयमा सचेतना अभिवृद्धि गर्ने लक्ष्य राखेको थियो।
ललितपुर महानगरपालिकाकी उप–मेयर मञ्जली शाक्य बज्राचार्यको गरिमामय उपस्थितिले कार्यक्रमलाई थप विशेष बनाएको थियो।
सहभागीहरूले भनिमण्डल, ठाडोढुंगा र सानेपा क्षेत्र हुँदै ५ किलोमिटर दूरी पार गरी जावलाखेलमै समापन गरेका थिए। सहज र समथर मार्गका कारण परिवार, युवा, ज्येष्ठ नागरिक तथा अपाङ्गता भएका व्यक्तिहरूको उल्लेखनीय सहभागिता रहेको थियो।
कार्यक्रमको प्रमुख आकर्षणका रूपमा जावलाखेल ह्वीलचेयर खेलकुद क्लब र निर्मला फाउन्डेसनको सहकार्यमा ह्वीलचेयर दौड आयोजना गरिएको थियो। साथै ‘ब्लाइन्ड रक्स’का सेतो छडी प्रयोगकर्ता सहभागीहरूले पनि कार्यक्रममा भाग लिँदै समावेशिताको सशक्त सन्देश दिएका थिए।
कार्यक्रमको सुरुवात टाइटन जुम्बा फिटनेसद्वारा सञ्चालित ऊर्जावान वार्म–अप सत्रबाट गरिएको थियो। दौडपछि ‘ब्लाइन्ड रक्स’द्वारा सांगीतिक प्रस्तुति प्रस्तुत गरिएको थियो। साथै कार्यक्रममा महिला उद्यमी तथा सामुदायिक साझेदारहरूका स्टलहरू, बालबालिकाका लागि खेल क्षेत्र तथा फेस पेन्टिङ जस्ता गतिविधिहरू पनि समावेश गरिएको थियो।
कार्यक्रमबाट संकलित रकम नेपाल क्यान्सर सपोर्ट समूह, डुकुछापका बालबालिकाका लागि छात्रवृत्ति, वित्तीय साक्षरता तथा उद्यमशीलता तालिम कार्यक्रमहरू र ललितपुरका महिला समूहहरूलाई सहयोग गर्न प्रयोग गरिने जनाइएको छ।
कार्यक्रममा पुरुष, महिला, १८ वर्षमुनि, १८ वर्षमाथि तथा ह्वीलचेयर विधामा विजेताहरूलाई पुरस्कार प्रदान गरिएको थियो।
