काठमाडौं – आगामी चैत १२ गते बस्ने नवनिर्वाचित सांसदहरूको सपथ ग्रहण कार्यक्रमका लागि संसद सचिवालयले तयारी पुरा गरेको छ।
सिंहदरबारस्थित संघीय संसद भवनमा आयोजना हुने उक्त कार्यक्रममा नयाँ सांसदहरूलाई स्वागत गर्न र कार्यक्रमलाई व्यवस्थित बनाउन बैठक कक्षको व्यवस्थापन, प्राविधिक उपकरणहरूको जाँच तथा सरसफाइका कामलाई अन्तिम चरणमा पुर्याएको छ।
मंगलबार सिंहदरबारमा निर्माण भइरहेको संसद भवनको हालसम्मको तयारीबारे सञ्चारकर्मीलाई जानकारी गराउँदै संसद सचिवालयले शपथ र सभाका प्रारम्भिक बैठकका लागि बहुउद्देश्यीय हलमा आवश्यक सम्पूर्ण तयारी गरिएको जनाएको हो ।
सचिवालयका अनुसार प्रतिनिधिसभाको मुख्य हल निर्माण नभएका कारण बहुउद्देश्यीय हलमा नै प्रारम्भिक चरणका बैठकहरु बस्ने छन् । त्यसका लागि सिटहरु, रोष्टम, सभामुख आसन, महासचिव, सचिव, सचिवालय बस्ने ठाउँ लगाएतको व्यवस्थापन भइरहेको संघीय संसदका प्रवक्ता एकराम गिरीले जानकारी दिए ।
संसद सचिवालयका अनुसार सपथ ग्रहण कार्यक्रमलाई मर्यादित, व्यवस्थित र प्रभावकारी बनाउन आवश्यक सबै पूर्वतयारी अन्तिम चरणमा पुगेको छ। कार्यक्रममा ध्वनि प्रणाली, प्रकाश व्यवस्था तथा बैठक व्यवस्थापनलाई विशेष ध्यान दिइएको छ।
नवनिर्वाचित सांसदहरूले सोही दिन पद तथा गोपनीयताको सपथ लिने कार्यक्रम तय गरिएको छ। सपथ ग्रहणसँगै नयाँ प्रतिनिधिसभाको औपचारिक कार्यकाल प्रारम्भ हुने जनाइएको छ।
