काठमाडौं – थापाथलीपछि सरकारले शनिबार सिनामंगलस्थित सुकुम्बासी बस्तीमा पनि डोजर चलाएको छ। सप्ताहान्तभित्रै बस्ती खाली गराउने तयारीसँगै प्रशासनले तीव्र गतिमा खाली गराउने काम अघि बढाएको हो।
बस्ती हटाउन ठूलो संख्यामा प्रहरी परिचालन गरिएको छ। प्रहरीले माइकिङ गर्दै बासिन्दालाई घरभित्रका सामान सार्न आग्रह गर्नुका साथै ओसारपसारमा सहयोग समेत गरिरहेको छ।
तर, सिनामंगल क्षेत्रमा लामो समयदेखि बसोबास गर्दै आएका ठूलो संख्याका सुकुम्बासी परिवार भने यतिबेला अन्योलमा परेका छन्। ‘अब कहाँ जाने र के गर्ने?’ भन्ने प्रश्नले धेरै परिवार चिन्तित देखिएका छन्।
बस्ती हटाउने क्रममा बालबालिकाहरू रोइरहेका छन् भने समग्र वातावरण तनावपूर्ण बनेको छ। केही परिवार भने आफैं कोठा खोजेर अन्यत्र सरिसकेका छन्।
कतै जाने विकल्प नभएका परिवारलाई सुरक्षाकर्मीले नजिकैको रंगशालामा पुर्याएर अस्थायी व्यवस्थापन गरिएको प्रहरीले जनाएको छ।
सरकारले अतिक्रमण हटाउने अभियानलाई निरन्तरता दिने संकेत गरेसँगै काठमाडौंका अन्य सुकुम्बासी बस्तीमा पनि यसको असर पर्ने देखिएको छ।
