काठमाडौँ – महालक्ष्मीस्थान यतिबेला ज्याकारान्डा (Jacaranda) फूलले ढकमक्क बनेको छ। सडक किनारमा फुलेका बैजनी रंगका फूलहरूले सम्पूर्ण क्षेत्रलाई मनमोहक बनाउँदै स्थानीयवासी तथा आगन्तुकको ध्यान आकर्षित गरिरहेका छन्।
हरेक वर्ष वसन्त ऋतुमा फुल्ने ज्याकारान्डा फूल अहिले पूर्ण रूपमा फक्रिएका छन्। सडक दायाँबायाँ फैलिएका बैजनी फूल र भुइँभरि झरेका फूलका पत्रहरूले महालक्ष्मीस्थान क्षेत्रलाई प्राकृतिक सौन्दर्यले भरिपूर्ण बनाएको छ।
विशेषगरी बिहान र साँझको समयमा यहाँ फोटो खिच्ने, भिडियो बनाउने तथा घुम्न आउनेहरूको चहलपहल बढेको देखिन्छ। बैजनी फूलले सजिएको सडक अहिले फोटोग्राफर, सामाजिक सञ्जाल प्रयोगकर्ता तथा प्रकृतिप्रेमीहरूका लागि आकर्षणको केन्द्र बनेको छ।
प्रत्येक वर्ष ज्याकारान्डा फूल फुल्ने मौसमले महालक्ष्मीस्थानको सौन्दर्यलाई विशेष बनाउने गरेको छ। प्राकृतिक सौन्दर्यले भरिएको यो दृश्यले आन्तरिक पर्यटन प्रवर्द्धनमा समेत टेवा पुर्याएको छ।
तस्वीरहरू: सुजन श्रेष्ठ/अन्नपूर्ण टाइम्स
