काठमाडौं — नेपाली सेनाद्वारा जङ्गी अड्डामा सञ्चालन गरिएको चार दिने “रक्षा संवाददाता अभिमुखीकरण कार्यक्रम (Defence Correspondent Orientation Programme, DCOP)” आज सम्पन्न भएको छ।
वैशाख २८ गतेबाट सुरु भएको उक्त कार्यक्रममा विभिन्न मिडियामा कार्यरत २९ जना पत्रकारहरूलाई समापन समारोहमा जनसम्पर्क तथा सूचना निर्देशनालयका निर्देशक सहायक रथी राजाराम बस्नेतले प्रमाणपत्र प्रदान गर्नुभयो।
सोही अवसरमा विगत लामो समयदेखि काठमाडौं तथा आसपासका जिल्लाहरूमा नेपाली सैनिक रेडियो कार्यक्रम प्रसारण गर्दै आएका पाँच वटा एफएम रेडियो स्टेशनलाई सम्मानस्वरूप कदरपत्र प्रदान गरिएको थियो ।
अभिमुखीकरण कार्यक्रमका क्रममा सञ्चारकर्मीहरूलाई नेपाली सेनाका विविध गतिविधि, जिम्मेवारी तथा कार्यप्रणालीबारे जानकारी गराइएको थियो। साथै विपद् प्रतिकार्य, राष्ट्रिय सुरक्षा तथा समसामयिक विषयमा अन्तरक्रिया कार्यक्रम समेत सञ्चालन गरिएको थियो।
नेपाली सेनाका अनुसार यस्ता कार्यक्रमले देशका विभिन्न स्थानमा कार्यरत सञ्चारकर्मीहरूलाई नेपाली सेना सम्बन्धी समाचार सङ्कलन तथा सम्प्रेषणमा थप सहजता र स्पष्टता प्रदान गर्ने विश्वास लिइएको छ।
