काठमाडौं – नेपाली सेनालाई प्रकृति तथा वातावरण संरक्षणमा पुर्याएको योगदानको कदर गर्दै विश्व वन्यजन्तु कोष (WWF) ले विशेष सम्मान गरेको छ।
विश्व वन्यजन्तु कोष नेपालले आफ्नो ३३औँ स्थापना दिवसको अवसरमा सोमबार आयोजित कार्यक्रममा विगत ५० वर्षदेखि प्रकृति तथा वातावरण संरक्षण तथा वन्यजन्तु सुरक्षामा नेपाली सेनाले खेलेको भूमिकाको उच्च मूल्याङ्कन गर्दै सम्मान प्रदान गरेको हो।
नेपाली सेनाले राष्ट्रिय निकुञ्ज तथा वन्यजन्तु संरक्षण क्षेत्रमा उल्लेखनीय सफलता हासिल गर्दै आएको छ। सन् २०११, २०१३, २०१५, २०१६, २०१८ र २०१९ लाई “शून्य चोरी शिकारी वर्ष” का रूपमा मनाउन सफल भएपछि अब्राहम संरक्षण पुरस्कारबाट सेनाका विभिन्न ६ युनिट सम्मानित भएका थिए। त्यस्तै बर्दिया राष्ट्रिय निकुन्जले “दोहोरो बाघ पुरस्कार” समेत प्राप्त गरेको थियो।
वि.सं. २०३२ सालदेखि औपचारिक रूपमा राष्ट्रिय निकुञ्ज सुरक्षार्थ खटिँदै आएको नेपाली सेना हाल १२ राष्ट्रिय निकुञ्ज, एक वन्यजन्तु आरक्ष र एक सिकार आरक्षको संरक्षणमा परिचालित छ। यस कार्यमा ८ गण, ७ अनाश्रित गुल्म र १ प्रकृति संरक्षण शिक्षालयमार्फत करिब ८ हजारभन्दा बढी सैनिक खटिएका छन्।
संरक्षण प्रयासकै परिणामस्वरूप सन् २००९ मा १२१ रहेको पाटे बाघको सङ्ख्या हाल ३५५ पुगेको छ भने सन् २००५ मा ४०० रहेको एकसिङ्गे गैँडाको सङ्ख्या बढेर ७५२ पुगेको तथ्याङ्क सार्वजनिक गरिएको छ।
जटिल भौगोलिक अवस्था, प्रतिकूल मौसम र विषम परिस्थितिका बाबजुद नेपाली सेनाले संरक्षण जिम्मेवारी प्रभावकारी रूपमा निर्वाह गर्दै आएको जनाएको छ। यस क्रममा प्रकृति तथा वन्यजन्तु संरक्षण अभियानमा खटिँदा हालसम्म नेपाली सेनाका ११६ जना सकलदर्जाले वीरगति प्राप्त गरिसकेका छन्।
