काठमाडौं – राष्ट्रिय मानव अधिकार आयोग ले ‘जेनजी’ आन्दोलनका क्रममा भएको मानवअधिकार उल्लंघनसम्बन्धी छानबिन प्रतिवेदन सार्वजनिक गर्दै ‘रुटिन अफ नेपाल बन्द’ फेसबुक पेजका सञ्चालक भिक्टर पौडेल सहित विभिन्न व्यक्तिमाथि अनुसन्धान गर्न सरकारलाई सिफारिस गरेको छ ।
आयोगले २०८२ भदौ २३ र २४ गते भएको आन्दोलनका घटनाबारे अनुसन्धान गर्न आयोगकी सदस्य लिली थापा को संयोजकत्वमा समिति गठन गरेको थियो । सो समितिले तयार पारेको प्रतिवेदन बुधबार सार्वजनिक गरिएको हो ।
प्रतिवेदनमा युट्युबर भाग्य न्यौपाने, टंक दाहाल, अंकित मल्ल, उमेश बोहरा, शिव यादव, विनोद देउवा, सरु सुनुवार, भीम उपाध्याय तथा रवि किरण हमाल माथि पनि अनुसन्धान गर्न सिफारिस गरिएको उल्लेख छ ।
त्यस्तै चलचित्र निर्देशक निश्चल बस्नेत माथिसमेत अनुसन्धान गर्न आयोगले सरकारलाई सुझाव दिएको छ ।
आयोगका अनुसार उनीहरूले सामाजिक सञ्जाल तथा सार्वजनिक अभिव्यक्तिमार्फत प्रदर्शनलाई भड्काउन भूमिका खेलेको देखिएको भन्दै थप अनुसन्धान आवश्यक रहेको निष्कर्ष निकालिएको हो ।
