काठमाडौं – नेपाली कांग्रेसले प्रधानमन्त्री वालेन्द्र शाहले संसदमा दिएको ‘नेपालले भारतीय भूमि मिचेको’ भन्ने अभिव्यक्ति प्रमाणित गर्न वा संसदको अभिलेख (रेकर्ड) बाट हटाउन माग गरेको छ।
आइतबार प्रतिनिधिसभाको बैठकमा कांग्रेस प्रमुख सचेतक वासना थापाले प्रधानमन्त्रीको अभिव्यक्तिप्रति आपत्ति जनाउँदै नेपालले भारतीय भूमि कहाँ र कसरी मिचेको हो भन्ने विषयमा स्पष्ट पार्न माग गरिन्।
उनले प्रधानमन्त्रीले संसदको रोस्ट्रमबाट दिएको अभिव्यक्ति गम्भीर विषय भएकाले त्यसबारे तथ्यसहित जानकारी दिनुपर्ने बताइन्। यदि त्यसको पुष्टि गर्न नसकिने हो भने उक्त भनाइ संसदको रेकर्डबाट हटाउनुपर्ने उनको माग थियो।
यसअघि प्रधानमन्त्री शाहले संसदको रोस्ट्रमबाट सम्बोधन गर्ने क्रममा नेपालले भारतीय भूमि मिचेको जानकारी गराएका थिए। उक्त अभिव्यक्तिपछि संसदमा विभिन्न दलका सांसदहरूले चासो र आपत्ति जनाएका छन्।
यस्तै, नेपाल कम्युनिस्ट पार्टीका सांसद रमेश मल्लले पनि प्रधानमन्त्रीको अभिव्यक्तिप्रति आपत्ति जनाउँदै यसलाई गम्भीर विषयको रूपमा लिनुपर्ने बताए। उनले प्रधानमन्त्रीको भनाइले राष्ट्रिय हित र अन्तर्राष्ट्रिय सम्बन्धसँग सम्बन्धित संवेदनशील विषय उठाएकाले आवश्यक स्पष्टता दिनुपर्ने धारणा राखे।
मल्लले पनि उक्त अभिव्यक्ति पुष्टि हुन नसके संसदको रेकर्डबाट हटाउन माग गरेका छन्। प्रधानमन्त्रीको भनाइलाई लिएर संसदमा थप छलफल हुने सम्भावना देखिएको छ।
