काठमाडौं – सरकारले मन्त्रालयहरूको संख्या घटाउँदै प्रशासनिक संरचना पुनर्गठन गरेसँगै ऊर्जा, जलस्रोत तथा सिँचाइमा अब एक जना मात्र सचिव रहने भएका छन् ।
सरकारले स्वीकृत गरेको नेपाल सरकार कार्य विभाजन नियमावली, २०८३ अनुसार मन्त्रालयहरूको संख्या २२ बाट १८ मा झारिएपछि सचिवहरूको दरबन्दी पुनः मिलान गरिएको हो । सोही निर्णयअनुसार दुई सचिव रहने मन्त्रालयहरूमा अब एक जना मात्र सचिव राख्ने व्यवस्था लागू गरिएको छ ।
यसक्रममा अब मन्त्रालयमा सिँचाइतर्फकी सचिव सरिता दवाडी मात्र सचिवका रूपमा रहनेछिन् ।
ऊर्जा जलस्रोत तथा सिँचाइ मन्त्रालयका सचिव चिरन्जिवी चटौतलाई सरुवा गरेर नेपाल ट्रष्टको कार्यालयमा पुर्याइएको छ । जल तथा ऊर्जा आयोगका सचिव दिनानाथ मिश्रलाई राष्ट्रिय सतर्कता केन्द्रमा पुर्याइएको छ। सरजुकुमार वैद्यलाई जल तथा ऊर्जा आयोगको सचिवालयको जिम्मेवारी सुम्पिएको छ।
नयाँ व्यवस्थासँगै ऊर्जा जलस्रोत तथा सिँचाइ मन्त्रालयको प्रशासनिक तथा प्राविधिक नेतृत्वको सम्पूर्ण जिम्मेवारी अब दवाडीले एक्लै सम्हाल्ने भएकी छिन् ।
