काठमाडौं – नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, इटहरीले ट्राफिक नियम उल्लङ्घन गरेको भन्दै श्रम संस्कृति पार्टीका अध्यक्ष हर्क साम्पाङलाई कारबाही गरेको छ।
ट्राफिक प्रहरीले साम्पाङले लापरबाहीपूर्ण ढङ्गले मोटरसाइकल चलाउँदै ट्राफिक नियम उल्लङ्घन गरेको निष्कर्ष निकाल्दै कारबाही गरेको जनाएको छ।
गत जेठ २२ मा उदयपुरको बेलकामा आयोजित एक कार्यक्रममा सहभागी हुन जाँदै गर्दा उनले मोबाइलमा भिडियो बनाउँदै सवारी चलाएका थिए। उनले उदयपुरबाट फर्किने क्रममा दुर्घटनामा परेको र आफूलाई सामान्य चोट लागेको जानकारी सामाजिक सञ्जालमार्फत दिएका थिए।
साम्पाङले आफ्नै सामाजिक सञ्जाल पृष्ठमा सार्वजनिक गरेको भिडियोमा एक हातले मोटरसाइकल चलाउँदै अर्को हातले मोबाइल फोनबाट भिडियो खिचिरहेको देखिन्छ। भिडियोमा उनले हेल्मेटसमेत नलगाएको देखिएका छन्। साथै दुर्घटनापछि हातमा चोट लागेको अवस्थासमेत देखाइएको छ।
उक्त भिडियो सामाजिक सञ्जालमा व्यापक रूपमा फैलिएको थियो। त्यसपछि ट्राफिक प्रहरीले भिडियोको आधारमा नियम उल्लङ्घन गरेको ठहर गर्दै कारबाही प्रक्रिया अघि बढाएको जनाएको छ।
