विराटनगर — नेपाली कांग्रेसका पूर्वमहामन्त्री शशांक कोइराला ले पार्टी व्यवहारिक रूपमा फुटिसकेको बताएका छन्। विराटनगरमा जारी नेपाली कांग्रेसको संस्थापनइतर समूहको भेलालाई सम्बोधन गर्दै उनले सर्वोच्च अदालत र निर्वाचन आयोगका निर्णयका कारण कांग्रेस व्यवहारिक रूपमा विभाजनको अवस्थासम्म पुगेको टिप्पणी गरे।
कोइरालाले सर्वोच्च अदालत र निर्वाचन आयोगको निर्णयप्रति असन्तुष्टि जनाउँदै यिनै कारणले पार्टी अहिलेको अवस्थासम्म आइपुगेको आरोप लगाए।
उनले वर्तमान परिस्थितिमा सबैभन्दा ठूलो आवश्यकता पार्टी एकता भएको उल्लेख गर्दै कांग्रेस बलियो नभएसम्म देशको विकास सम्भव नहुने जिकिर गरे। साथै, लोकतान्त्रिक मूल्य–मान्यता र परिवर्तनको पक्षमा उभिन नेता तथा कार्यकर्ताहरू एकताबद्ध हुनुपर्ने बताए।
वर्तमान सभापति गगन थापा लाई संकेत गर्दै उनले धेरै पुराना र अनुभवी नेताहरू बाहिर रहँदा एक्लै पार्टी सञ्चालन गर्न सम्भव नहुने धारणा व्यक्त गरे।
उनले भने, ‘लामो संघर्ष र ठूलो बलिदानबाट बनेको कांग्रेस अहिले टुक्रिएको अवस्थामा पुग्नु पीडादायी छ। यो पार्टी आफैँ नटुक्रिएको बरु यसलाई टुक्र्याइएको हो।’
