काठमाडौं — प्रतिनिधि सभा बैठकमा सभामुख प्रवेश गर्दा दुई मन्त्रीले सम्मान प्रकट नगरेको भन्दै संसदमा प्रश्न उठेको छ। मंगलबार बसेको प्रतिनिधि सभाको दोस्रो बैठकमा प्रतिपक्षी दल नेकपा एमालेका प्रमुख सचेतक ऐनबहादुर महर ले नियमापत्ति जनाउँदै सदनको गरिमा र मर्यादामाथि प्रश्न उठाएका हुन्।
प्रतिनिधि सभा नियमावली २०८३ को नियम २० को खण्ड ‘क’ अनुसार सभामुख बैठक कक्षमा प्रवेश गर्दा उपस्थित सदस्यहरूले उठेर सम्मान व्यक्त गर्नुपर्ने व्यवस्था छ। तर बैठक सुरु हुने क्रममा दुई मन्त्री आफ्नो आसनमै बसेको भन्दै महरले सभामुखको ध्यानाकर्षण गराएका थिए।
बैठकमा सहभागी सांसदहरूका अनुसार अर्थमन्त्री स्वर्णिम वाग्ले र भौतिक पूर्वाधार विकासमन्त्री सुनिल लम्साल सभामुख बैठक कक्षमा प्रवेश गर्दा उठेका थिएनन्।
नियमापत्ति गर्दै महरले भने, ‘सदनको गरिमा कायम राख्ने हामी सबैको अनिवार्य जिम्मेवारी र दायित्व हो। मर्यादा पालना गर्नेमा सबै जिम्मेवार बन्नुपर्छ। सभामुख बैठक कक्षमा प्रवेश गर्दा सबै सदस्यले उठेर सम्मान गर्नुपर्छ भन्ने विषय नियमावलीमा उल्लेख छ। अघि बैठक सुरु गर्दै गर्दा दुई मन्त्रीले सम्मान गर्नुभएको छैन। यसले हामीलाई चिन्तित बनाएको छ।’ उनले भिडियो रेकर्ड जाँच गरी आवश्यक रूलिङ गर्न पनि आग्रह गरेका थिए।
यद्यपि सभामुख डीपी अर्यालले उक्त विषयमा तत्काल कुनै रूलिङ गरिनन्।
