बुटवल— लियो क्लब अफ बुटवल गोल्डेन जुबिलीले संस्थापक अध्यक्ष भेषराज पोखरेलका पिता स्वर्गीय नुमराज पोखरेलको स्मृतिमा निर्माण गरिएको खानेपानी धारा जितेश्वरी माध्यमिक विद्यालय, बुटवल–१३ बदेलपोखरीलाई हस्तान्तरण गरेको छ।
विशेष समारोहका बीच विद्यालय परिसरमा निर्माण गरिएको धाराको उद्घाटन तथा हस्तान्तरण गरिएको हो। संस्थापक अध्यक्ष पोखरेलका सुपुत्र सम्राट पोखरेलको जन्मदिनको अवसर पारेर विद्यालय तथा स्थानीय समुदायलाई लक्षित गर्दै धारा निर्माण गरिएको क्लबले जनाएको छ।
कार्यक्रमका प्रमुख अतिथि लियो जिल्ला परिषद् ३२५ पी नेपालका जिल्ला अध्यक्ष तथा लियो क्लब अफ बुटवल गोल्डेन जुबिलीका पूर्व अध्यक्ष श्रीधर बस्यालले सामाजिक उत्तरदायित्वअन्तर्गत विद्यालयमा शुद्ध खानेपानीको पहुँच विस्तार गर्ने उद्देश्यले योजना सञ्चालन गरिएको बताए।
धारा निर्माण समितिका संयोजक आत्माराम भण्डारी, सह–संयोजक लक्ष्मण खनाल तथा विशाल खनाल, पूर्व अध्यक्ष एवं एरिया चिफ जीवन थापा क्षेत्रीलगायतले संस्थापक अध्यक्ष भेषराज पोखरेलको परिकल्पनाअनुसार विद्यालयमा सुरक्षित खानेपानी उपलब्ध गराउन धारा निर्माण गरिएको जानकारी दिए।
विद्यालयका प्राचार्य उपेन्द्र ज्ञवालीले क्लबले विद्यालयलाई छनोट गरी महत्वपूर्ण सामाजिक कार्य गरेको भन्दै धन्यवाद व्यक्त गरे। उनले यस योजनाबाट विद्यार्थी, शिक्षक तथा विद्यालय परिवार प्रत्यक्ष रूपमा लाभान्वित हुने विश्वास व्यक्त गरे।
कार्यक्रममा लियो क्लबका संस्थापक तथा पूर्व अध्यक्षहरू, वर्तमान कार्यसमितिका पदाधिकारी, विभिन्न सामाजिक तथा परोपकारी संस्थाका प्रतिनिधि, समाजसेवी, शिक्षक, विद्यार्थी तथा अभिभावकहरूको सहभागिता रहेको थियो।वक्ताहरूले स्वर्गीय नुमराज पोखरेलको स्मृतिलाई समाजसेवासँग जोडेर गरिएको कार्य प्रशंसनीय रहेको बताए। उनीहरूले विद्यालयमा शुद्ध तथा सुरक्षित खानेपानीको उपलब्धता सुनिश्चित गर्न धारा प्रभावकारी हुने धारणा राखे।
क्लबका अध्यक्ष लियो अशोक कुमार श्रेष्ठले सामाजिक उत्तरदायित्व र मानवीय सेवाका कार्यलाई आगामी दिनमा पनि निरन्तरता दिइने बताए। कार्यक्रममा समाजसेवी कमल सापकोटा तथा सरु थापाले क्लबप्रति आभार व्यक्त गर्दै यस्ता परोपकारी कार्यले समाजमा सकारात्मक सन्देश प्रवाह गर्ने बताए। कार्यक्रमको सञ्चालन क्लबका मेम्बरसिप चेयरपर्सन लियो कविराज भुसालले गरेका थिए।
