ललितपुर – वर्षा र सहकालका देवताका रूपमा पूजिने रातो मच्छिन्द्रनाथको रथजात्राको अन्तिम अवसरमा शनिबार ललितपुरको जावलाखेलमा परम्परागत भोटो जात्रा सम्पन्न भएको छ। रथ जावलाखेल पुर्याइएको चौथो दिन राष्ट्रपति रामचन्द्र पौडेलको उपस्थितिमा परम्पराअनुसार बहुमूल्य भोटो प्रदर्शन गरिएको हो। कार्यक्रममा प्रधानमन्त्री बालेन्द्र शाह लगायत उच्च पदस्थ व्यक्तिहरू पनि सहभागी भएका थिए।
मणिमाणिक्यले सजिएको भोटो अवलोकन गर्न जावलाखेल क्षेत्रमा सर्वसाधारणको उल्लेखनीय उपस्थिति रहेको थियो। परम्पराअनुसार गुठी संस्थानका प्रतिनिधिले उपस्थित सर्वसाधारणलाई भोटो प्रदर्शन गरेका थिए।
लोकविश्वासअनुसार एक ज्यापु वैद्य र भूतबीच उक्त बहुमूल्य भोटोको स्वामित्वलाई लिएर विवाद उत्पन्न भएपछि वास्तविक हकदारको पहिचान नभएसम्म सार्वजनिक रूपमा भोटो देखाउने परम्परा सुरु भएको मानिन्छ। दाबी गर्ने व्यक्ति नआएसम्म भोटो रातो मच्छिन्द्रनाथ कै रहने विश्वास रहिआएको छ।
