काठमाडौं – आज अन्तर्राष्ट्रिय योग दिवस विभिन्न कार्यक्रम आयोजना गरी नेपालसहित विश्वभर मनाइदैछ । नेपालमा पनि योग अभ्यास, जनचेतनामूलक कार्यक्रम तथा सामूहिक योग प्रदर्शनमार्फत दिवस मनाइने गरिन्छ । अन्तर्राष्ट्रिय योग दिवस हरेक वर्ष जुन २१ मा मनाइने गरिन्छ।
संयुक्त राष्ट्रसंघको महासभाले सन् २०१४ डिसेम्बर ११ मा अन्तर्राष्ट्रिय योग दिवस मनाउने प्रस्ताव पारित गरेपछि सन् २०१५ जुन २१ देखि विश्वभर औपचारिक रूपमा यो दिवस मनाउन थालिएको हो।
अन्तर्राष्ट्रिय योग दिवसको अवसरमा आज देशभर विभिन्न स्थानमा योग कार्यक्रम सञ्चालन गरिएका छन्। योगलाई शरीर, मन र चेतनाबीच सन्तुलन कायम गर्ने अभ्यासका रूपमा लिइन्छ। अस्थिर मनलाई स्थिर बनाउने, अज्ञानताबाट ज्ञानतर्फ, अचेतनाबाट चेतनातर्फ तथा दुर्बलताबाट सबलतातर्फ लैजाने आध्यात्मिक यात्राका रूपमा पनि योगलाई व्याख्या गरिन्छ।
नियमित योग अभ्यासले नसर्ने रोगहरूको नियन्त्रण तथा व्यवस्थापनमा सहयोग पुग्ने विश्वास गरिन्छ। दैनिक करिब ३० मिनेट योग गर्दा शरीरमा ताजगी आउनुका साथै तौल नियन्त्रण, मानसिक शान्ति र समग्र स्वास्थ्यमा सकारात्मक प्रभाव पर्ने बताइन्छ।
यसै अवसरमा भक्तपुर दरबार क्षेत्रमा सर्वसाधारणले सामूहिक रूपमा योग अभ्यास गर्दै दिवस मनाएका छन् । कार्यक्रममा सहभागीहरूले योगलाई दैनिक जीवनको हिस्सा बनाउनुपर्नेमा जोड दिएका थिए।
