चितवन-। राष्ट्रिय स्वतन्त्र पार्टी (रास्वपा) को पहिलो महाधिवेशन अन्तर्गत बन्दसत्र आजदेखि चितवनमा सुरु हुँदैछ । देशभरका जिल्ला, प्रवास तथा विभिन्न तहका कमिटीबाट झण्डै ४१ सय प्रतिनिधि महाधिवेशनमा सहभागी भएका छन् ।
महाधिवेशनस्थलमा सहभागी प्रतिनिधिहरूको खानपान व्यवस्थापन आज बिहानदेखि औपचारिक रूपमा सुरु गरिएको छ । अधिकांश प्रतिनिधि हिजो नै चितवन पुगिसकेका छन् भने बसोबासको व्यवस्था आफैंले मिलाएका छन् ।
रास्वपाले प्रतिनिधिहरूका लागि बिहानको ब्रेकफास्ट, दिउँसोको खाना, दिउँसो हाइटी तथा बेलुकाको खानाको व्यवस्था गरेको जनाएको छ ।
खानाको व्यवस्थापन जिम्मा दियालो फुडल्याण्ड, क्षेत्रपुर–नारायणगढले तीन दिनका लागि लिएको छ । व्यवस्थापन पक्षका अनुसार बिहानको मुख्य खानामा खसीको मासु र भात समावेश गरिएको छ । सहभागीहरूको संख्यालाई ध्यानमा राख्दै बिहानका लागि मात्रै दैनिक झण्डै ८ क्विन्टल खसीको मासु तयारी गरिएको छ ।
बेलुकाको भोजनमा भने मिक्सभेज तरकारीलाई प्राथमिकता दिइने जनाइएको छ । मासु नखाने प्रतिनिधिहरूका लागि पनिर, च्याउ र सिजनल तरकारीको विकल्प राखिएको छ । बिहान र बेलुकाको भोजनमा कम्तीमा १० प्रकारका परिकार समावेश गरिने तयारी गरिएको छ ।
दियालो फुडल्याण्डका प्रवन्ध निर्देशक रमेश अधिकारीका अनुसार बिहान ७ बजेदेखि ब्रेकफास्ट, दिउँसो १ बजेदेखि २:३० बजेसम्म खाना, दिउँसो ३ देखि ५ बजेसम्म हाइटी तथा बेलुका ६ देखि ९ बजेसम्म रातिको खानाको तालिका तय गरिएको छ ।
चितवनको गर्मीलाई ध्यानमा राख्दै खाद्य सुरक्षामा विशेष सावधानी अपनाइएको अधिकारीले बताए । खाना तयारी र वितरणका लागि करिब २ सय कर्मचारी तथा कामदार परिचालन गरिएको छ ।
महाधिवेशनस्थलमै झण्डै ५ हजार जनाका लागि लाइभ कुकिङ गरेर भोजन गराउने व्यवस्था गरिएको जनाइएको छ । खाना वितरणका लागि १५ वटा टेबल स्टल राखिएको छ भने जिरा राइस, दाल, तरकारी, अचार, सलाद र दहीलगायतका परिकार उपलब्ध गराइनेछन् ।
प्रतिनिधिहरूलाई खानाका लागि कुपन व्यवस्था गरिएको छ । रास्वपाले प्रत्येक प्रतिनिधिबाट ५ हजार रुपैयाँ अधिवेशन शुल्क उठाएको छ भने बसोबास खर्च प्रतिनिधिले आफैं व्यहोर्नुपर्ने व्यवस्था गरिएको छ ।
