चितवन – राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीको सभापति पदका लागि उम्मेदवारी दर्ता गरेका छन्। उनको उम्मेदवारीमा वरिष्ठ नेता बालेन्द्र शाह (बालेन) प्रस्तावक बनेका छन्।
चितवनमा जारी रास्वपाको महाधिवेशनअन्तर्गत केन्द्रीय सदस्य पदका लागि मनोनयन फाराम वितरण प्रक्रिया सुरु भएको छ। महाधिवेशनले नयाँ नेतृत्व चयन गर्ने कार्यक्रमअनुसार निर्वाचन प्रक्रिया अघि बढाइएको हो।
रास्वपाको विधानअनुसार सभापति र वरिष्ठ नेता पदका लागि केन्द्रीय सदस्य निर्वाचित हुनुपर्ने व्यवस्था छैन। तर बाँकी ९९ जना पदाधिकारी तथा सदस्य भने केन्द्रीय सदस्यका रूपमा निर्वाचित हुनुपर्ने प्रावधान रहेको छ।
निर्वाचन कार्यतालिकाअनुसार पहिलो चरणको मतदान बुधबार बिहानदेखि सुरु हुने जनाइएको छ। पहिलो चरणमा पार्टी सभापति र केन्द्रीय सदस्यहरूको निर्वाचन हुनेछ।
मतदानको समय भने निर्वाचन आयोगले सार्वजनिक गरिसकेको छैन। मतदान सम्पन्न भएको दुई घण्टाभित्र पहिलो चरणको मतगणना सुरु गरी नतिजा घोषणा गरिने निर्वाचन आयोगका प्रमुख भुवन केसीले जानकारी दिएका छन्।
